Акмал Саидов «Миллий тикланиш» партиясидан Ўзбекистон Президентлигига номзод сифатида таклиф қилинди

2015 йил 16 январь куни Тошкент шаҳрида Ўзбекистон «Миллий тикланиш» демократик партияси Марказий Кенгашининг навбатдаги Пленуми бўлиб ўтди. Бу ҳақда ЎзМТДП Ахборот хизмати «Дарё»га маълум қилди.

Унда Ўзбекистон «Миллий тикланиш» демократик партияси Марказий Кенгаши, Олий Мажлис Қонунчилик палатасидаги партия фракцияси ва халқ депутатлари маҳаллий Кенгашлардаги партия гуруҳлари аъзолари, партия фаоллари ва оммавий ахборот воситалари вакиллари иштирок этдилар.

Пленумда 2015 йил 29 март куни бўлиб ўтадиган Ўзбекистон Республикаси Президенти сайловида Ўзбекистон «Миллий тикланиш» демократик партиясининг иштироки, Ўзбекистон Республикаси Президентлигига «Миллий тикланиш» демократик партиясидан номзод кўрсатиш таклифи ҳамда партиянинг навбатдаги Съездини чақириш тўғрисидаги масалалар муҳокама қилинди.

Пленумда эътироф этилганидек, Ўзбекистон Республикаси Марказий сайлов комиссияси томонидан 2014 йилнинг 26 декабридан Ўзбекистон Республикаси Президенти сайлови бўйича сайлов кампанияси бошланганлиги эълон қилинди. Шунингдек, Ўзбекистон Республикаси Президенти сайловига тайёргарлик кўриш ва уни ўтказиш бўйича асосий тадбирлар дастури тасдиқланди.

Ўзбекистон «Миллий тикланиш» демократик партиясининг Уставида партиянинг Ўзбекистон Республикаси Президентлигига бўлиб ўтадиган сайловларда иштирок этиши белгиланган.

Шундан келиб чиққан ҳолда Пленумда партиянинг Ўзбекистон Республикаси Президенти сайловида иштирок этиши тўғрисида қарор қабул қилинди.«Миллий тикланиш» демократик партиясидан Ўзбекистон Республикаси Президентилигига номзод тавсия этиш масаласи Пленум иштирокчиларининг фикр-мулоҳазалари ва таклифлари асосида кўриб чиқилди. Бу масалада Олий Мажлис Қонунчилик палатасидаги «Миллий тикланиш» демократик партияси фракциясининг аъзоси Акмал Холматович Саидов номзодини партиядан Ўзбекистон Республикаси Президентлигига номзод сифатида кўрсатиш қўллаб-қувватланди.

Амалдаги сайлов қонунчилигига асосан Ўзбекистон Республикаси Президенти лавозимига партия томонидан номзод кўрсатиш партиянинг олий органи – съезди томонидан амалга оширилади. Шундан келиб чиқиб, Пленумда жорий йил 7 февраль куни партиянинг навбатдаги IV Съездини чақириш ва бу масалани Съезд муҳокамасига қўйишга келишиб олинди.

Пленум сўнгида муҳокама этилган барча масалалар юзасидан тегишли қарорлар қабул қилинди.