Avstraliya futbol saytlaridan biri Australiascout.com Osiyo Kubogi oldidan O‘zbekiston terma jamoasi haqida maqola chop etdi. “Olamsport” ushbu taktik prevyuning tarjimasini taqdim etdi.
O‘zbekiston terma jamoasi Osiyo chempionatlarida muvaffaqiyatli ishtiroki bilan iz qoldirgan. Bu safar ham shunday bo‘lishi mumkin. Bosh murabbiy Mirjalol Qosimov yaxshi jamoani shakllantira oldi. Umuman olganda, O‘zbekiston musobaqada “qora tulpor”dek gap, ulardan nima kutishni oldindan aytish qiyin. Lekin guruhdan chiqa oladi desa bo‘ladi.
Katta ehtimol bilan Qosimov 4-2-3-1 sxemasidan foydalanadi. Aslini olganda, turnirda eng ko‘p foydalanadigan taktik sxema ham aynan 4-2-3-1 bo‘lsa ajab emas. O‘zbekiston termasi hozir yaxshi holatda, ular to‘p bilan oldinga harakat qilishni ma’qul ko‘rishadi. Shuningdek, jamoa to‘psiz ham ko‘p mehnat qiladi.
Himoyachilardan Shavkat Mullajonov bilan Anzur Ismoilov jismoniy jihatdan kuchli o‘yinchilar, ular raqibni “yopib” qo‘ya olishadi. Rossiya chempionatida o‘ynayotgan chap qanot himoyachisi Vitaliy Denisov musobaqaning eng yaxshilari qatoridan joy olishi mumkin. O‘ng qanotda esa Osiyo o‘yinlarida qatnashgan Islom To‘xtaxo‘jayev harakat qiladi.
Yarim himoyada tajribali Temur Kapadze bor, u ko‘proq orqaroqda harakat qiladi, uning yonida yana bir yaxshi tayanch futbolchisi Aziz Haydarov o‘ynaydi. Bu ikki futbolchi qatoriga Odil Ahmedov ham qo‘shilsa, qarabsizki maydon markazida o‘ziga xos uchburchak yuzaga keladi. Odil Ahmedovni ko‘pchilik bundan to‘rt yil avvalgi musobaqa orqali bilib olgan. U to‘p bilan oldinga juda yaxshi va tez harakat qiladi. Qolaversa, uzoqdan zarba berishni yoqtiradi. Qatarga qarshi ilk o‘yinda uning golini bir eslab ko‘ring-a.
Odil Ahmedov shubhasiz terma jamoaning “oltin toji” hisoblanadi. U nafaqat markazdan, balki qanotlardan ham xavf tug‘dirishi mumkin. Uning Yangi Zelandiya darvozasiga kiritgan ikkala goli ham chiroyli chiqqandi. Agar Ahmedov orqaroqda to‘p tepsa, unda 10-raqamli futbolchi vazifasini Server Jeparov bajaradi. Kuchli raqiblarga qarshi bellashuvlarda Qosimov himoya chizig‘ining old qismida ikki nafar tayanch yarim himoyachi bilan o‘ynashni xush ko‘radi. Bunda Jeparov chap qanotdan ko‘ra markazga yaqinroq joydan o‘rin oladi.
Natijada Vitaliy Denisovda hujumga ko‘proq qo‘shilish varianti yuzaga keladi. Jeparov milliy terma safida 100dan oshiq o‘yinda maydonga tushgan, ikki bor (2008, 2011) “Osiyoning eng yaxshi futbolchisi” deb topilgan. Terma jamoa tarkibida 23 ta goli bilan to‘purarlar ro‘yxatida to‘rtinchi o‘rinda boryapti, uning ayniqsa yangicha soch turmagi jurnalistlar e’tiborini tortishi mumkin.
Hujumda kim o‘ynaydi? Bu esa katta so‘roq. Terma jamoaning eng asosiy hujumchisi Maksim Shatskix ketganidan beri O‘zbekiston hujum chizig‘ida muammolarga duch kelyapti. Klubi safida 25 o‘yinda maydonga tushib, 11 ta gol urgan Igor Sergeyevning allaqachon o‘zini ko‘rsatadigan payt keldi. Ko‘rinib turibdiki, Ahmedov orqaroqda o‘ynagan bahslarda O‘zbekiston gol urishga qiynalyapti. Bunda qanot yarim himoyachilari asosiy planga chiqib qolishmoqda, lekin ular doim ham bir tekis harakat qila olishmayapti. Ammo markazdan hujum qilganda O‘zbekiston juda xavfli jamoaga aylanadi.
O‘zbekiston terma jamoasi bor imkoniyatini ishga solsa, Osiyo Kubogida yarim finalgacha bora oladi. Ammo ular uchun bu musobaqada ishtirok etishdan asosiy maqsad Rossiyada o‘tkaziladigan jahon chempionatiga borish uchun hozirdanoq poydevor qo‘yish hisoblanadi.
Izoh (0)