O‘zbekiston Golf assotsiatsiyasi Golf federatsiyasiga aylantirildi

O‘zbekiston milliy olimpiya qo‘mitasida O‘zbekiston Golf assotsiatsiyasining navbatdan tashqari konferensiyasi o‘tkazildi, deya xabar berdi UzReport. Unda O‘zbekiston Madaniyat va sport ishlari vazirligi, Milliy olimpiya qo‘mitasi mutasaddilari, Respublika Golf assotsiatsiyasining mas’ullari hamda mutaxassislar ishtirok etdi.

Yig‘ilishda olimpiada o‘yinlari dasturidan o‘rin egallagan golf sport turining mamlakatimizga kirib kelish tarixi, o‘tgan davr mobaynida sportning ushbu turini rivojlantirish borasida amalga oshirilgan ishlar va istiqboldagi rejalar haqida atroflicha so‘z yuritildi.

Konferensiyada O‘zbekiston Golf assotsiatsiyasini O‘zbekiston Golf federatsiyasiga aylantirish taklifi berildi. Ushbu taklif yig‘ilish ishtirokchilari tomonidan bir ovozdan ma’qullandi.

Shundan so‘ng, O‘zbekiston Golf federatsiyasining yangi rahbariyati saylandi. Unga ko‘ra Fyodor Kim Respublika Golf assotsiatsiyasi raisi, Sardor Mirzakarimov raisning birinchi o‘rinbosari, Yevgeniy Li esa rais o‘rinbosari etib bir ovozdan saylandi. O‘zbekiston Golf federatsiyasining bosh kotibi etib Ixtiyor Yo‘ldoshev saylandi.

Yig‘ilishda O‘zbekiston Golf federatsiyasining yangi Nizomi ham tasdiqlandi.