Kecha, 21-dekabr kuni O‘zbekiston Respublikasi Oliy Majlisi Qonunchilik palatasiga, xalq deputatlari viloyat, tuman va shahar Kengashlariga bo‘lib o‘tgan saylovlarning ochiq va oshkora o‘tishi unda ishtirok etgan xalqaro, xorijiy va mahalliy kuzatuvchilar faoliyati orqali ta’minlandi. Bu haqda O‘zbekiston Respublikasi Markaziy saylov komissiyasi raisi M. Abdusalomov o‘zining xalqaro va xorijiy kuzatuvchilar, mahalliy va chet el ommaviy axborot vositalari vakillari uchun o‘tkaziladigan matbuot anjumanidagi ma’ruzasida ma’lum qildi.
Saylovda Markaziy saylov komissiyasi tomonidan ro‘yxatga olingan beshta xalqaro tashkilot – Yevropada xavfsizlik va hamkorlik tashkilotining Demokratik institutlar va inson huquqlari bo‘yicha byurosi, Mustaqil Davlatlar Hamdo‘stligi, Shanxay hamkorlik tashkiloti, Butunjahon saylov organlari assotsiatsiyasi va Islom hamkorlik tashkilotidan hamda 50 dan ortiq davlatdan 300 dan ziyod kuzatuvchilar, shuningdek, siyosiy partiyalarning 70 mingdan ziyod kuzatuvchi va vakolatli vakillari ishtirok etdi.
Saylov jarayonini keng yoritish, jamoatchilikka O‘zbekistonda o‘tkazilgan saylov haqida xolis va to‘liq axborotlarni yetkazishda 340 dan ortiq mahalliy va chet el ommaviy axborot vositalarining vakillari ishtirok etdi.
Ularning faoliyatiga ko‘maklashish maqsadida saylovlarni yoritish bo‘yicha Respublika matbuot markazi tashkil etilib, unda jurnalistlar uchun barcha sharoitlar yaratildi. Bu yerda qator matbuot anjumanlari, brifinglar, seminarlar o‘tkazildi.
Izoh (0)