O‘zbek Milliy akademik drama teatrida “Debyut — 2014” respublika ko‘rik-festivalining g‘oliblari aniqlandi
O‘zbek Milliy akademik drama teatrida O‘zbekiston Madaniyat va sport ishlari vazirligi hamda “O‘zbekteatr” ijodiy-ishlab chiqarish birlashmasi tomonidan tashkil etilgan yosh ijodkorlarning “Debyut — 2014” beshinchi respublika ko‘rik-festivalining ochilish marosimi bo‘lib o‘tdi. Bu haqda O‘zbekiston Milliy axborot agentligi xabar bermoqda.
Unda O‘zbekiston teatr san’ati namoyandalari, san’atshunos olimlar, oliy o‘quv yurtlarining professor-o‘qituvchilari, talaba-yoshlar, ommaviy axborot vositalari vakillari ishtirok etdi.
O‘zbekiston madaniyat va sport ishlari vazirining birinchi o‘rinbosari F. Jalolov, O‘zbekiston Badiiy akademiyasi raisi A. Nuriddinov va boshqalar Prezident Islom Karimov rahnamoligida O‘zbekistonda professional teatr san’atini rivojlantirish, ijodiy jamoalar, havaskorlik studiyalarini har tomonlama qo‘llab-quvvatlash, ularning samarali faoliyat yuritishi uchun barcha shart-sharoitlarni yaratishga alohida e’tibor qaratilayotganini ta’kidladi.
“‘Debyut’ respublika ko‘rik-festivali teatr sohasiga endi kirib kelgan yosh ijodkorlarni qo‘llab-quvvatlashga qaratilgani bilan ahamiyatlidir. 2005-yildan boshlab o‘tkazib kelinayotgan ushbu ijodiy loyiha davomida 50 ga yaqin mahoratli yosh rejissyor kashf etildi. Ular tomonidan sahnalashtirilgan o‘nlab spektakllar xalqimizning ma’naviy mulkiga aylangan. Yaxshi spektakl mag‘zi to‘q asar, yuksak sahnalashtirilgan drama va undagi mahoratli ijro mevasidir.
Joriy yilgi ko‘rik-festivalga nafaqat yosh rejissyorlarni, balki yosh dramaturg, sahna rassomi va aktyorlarni ham jalb etdik. Natijada ko‘rik-festival ko‘lami yanada kengaydi. 5 yosh rejissyor, 10 dramaturg, 8 aktyor va 10 nafar rassomning ijodiy ishi mazkur festival dasturiga kiritildi”, — dedi ko‘rik-festival hakamlar hay’ati raisi, O‘zbekiston xalq artisti Yoqub Ahmedov.
Tadbir doirasida O‘zbek Milliy akademik drama teatri foyyesida yosh rassomlarning ko‘rgazmasi tashkil etildi.
“Tong otgan taraflarda” spektakli namoyish etilib, debyutant aktyor Saida Saidbekovaning ijro mahorati baholandi. Tarixiy rivoyatlar asosida yaratilgan mazkur spektaklda Vatanga muhabbat, xalqiga mehr va sadoqatli bo‘lish, millat sha’ni va qadr-qimmati uchun kurashib yashash kabi ulug‘vor g‘oyalar o‘z aksini topgan.
Bir hafta davom etadigan ko‘rik-festivalda har bir spektakl namoyishidan so‘ng taniqli ijodkorlar va mutaxassislar ishtirokida asarlar muhokamasi tashkil qilinadi. San’at muxlislari yoshlar sahnalashtirgan spektakllarni O‘zbek Milliy akademik drama teatri, Muqimiy nomidagi o‘zbek davlat musiqali teatri, O‘zbek davlat drama teatri, Respublika Yosh tomoshabinlar teatri, O‘zbekiston Yoshlar teatri singari teatrlarda tomosha qilish imkoniyatiga ega bo‘ladi.
San’at anjumani doirasida O‘zbekistonning yetakchi teatrlari rejissyorlari, teatrshunoslar ishtirokida yoshlar dramaturgiyasi, yosh aktyorlarning shakllanishida ustoz-shogird an’analarining o‘rniga bag‘ishlangan ilmiy-amaliy konferensiya o‘tkazish rejalashtirilgan.
“Debyut — 2014” ko‘rik-festivali yakunida g‘oliblar aniqlanib, ular diplom va esdalik sovg‘alari bilan taqdirlanadi.
