“O‘zbekfilm” kinostudiyasidagi pavilyonlarining birida estradamizning eng ko‘zga ko‘ringan xonandalari bo‘lmish Shahzoda hamda yoshlarning sevimli xonandasiga aylanib ulgurgan Jasur G‘oyipovlarning birga yaratgan “Super lady (Bari gal)” duet taronasi uchun videoklip suratga olinmoqda, deb xabar berdi Popcorn.uz.
O‘ttizdan ortiq kishini tashkil etadigan guruh rejissyor va operatorlardan tortib, liboslar bo‘yicha mutaxassislar, vizajistlar, chiroq ustalari va bir qancha texnik xodimlardan tashkil topgan.
Popcorn.uz’ning qayd etishicha, bugungi kunda duet ijro etayotgan xonandalar bisyor, biroq bu duetning boshqalaridan farqi shundaki, uni ayni vaqtda eng samarali ijod qilayotgan, yo‘nalishlari bir-birinikiga o‘xshamaydigan ikki ijodkor kuylagan. Shahzoda va Jasur G‘oyipov yaratgan duet zamonaviy musiqiy yo‘nalishda bo‘lib, ularning ikkisi ham mazkur duetni juda chiroyli tarzda ijro etgan.
Katta pavilyonda maxsus sahna yaratilgan bo‘lib, atrofga moslama va chiroqlar o‘rnatilgan. Rejissyorlik vazifasini Jamshid Hojiniyozov o‘z zimmasiga olgan. Uning so‘zlariga ko‘ra, kompyuter grafikasidan keng foydalaniladigan klip dekabr oyining birinchi yarmida taqdim etiladi.
Suratga olish maydonida operator sifatida professional klipmeyker Yodgor Nosirov ishlayotgan bo‘lsa, xonandalar uchun maxsus liboslar iste’dodli dizayner Hilola Sher tomonidan yaratilgan.
Izoh (0)