AQSh “Donetsk xalq respublikasi” va “Lugansk xalq respublikasi”dagi saylovlarni tan olishdan bosh tortib, Rossiyani ham bunday qilmaslikka chaqirmoqda va aks holda buning uchun javob berishiga to‘g‘ri kelishini aytmoqda. Bu haqda Rbc.ru xabar berdi.
AQSh Davlat departamenti rasmiy vakili Jen Psaki va Milliy xavfsizlik kengashi vakili Bernadett Mixan Vashingtonda ushbu mavzu bo‘yicha o‘xshash bayonotlar bilan chiqdi.
“Agar Rossiya ushbu ‘saylovlar’ni tan olsa, bu uning kelajakdagi izolyatsiyasigagina xizmat qiladi”, — dedi Psaki, biroq bunday holatda AQSh aynan qanday chora qo‘llashiga aniqlik kiritmadi.
Davlat departamentining rasmiy vakili YeI davlatlari yetakchilarining DXR va LXRdagi saylovlarni tan olmaslik haqidagi bayonotlarini ma’qulladi.
Mixan o‘z navbatida Rossiya tashqi ishlar vazirligining Donbassdagi saylovlarni tan olishga tayyorliklari haqidagi bayonoti yuzasidan xavotir bildirdi. Uning aytishicha, agar shunday bo‘lsa, Moskva Minsk bitimini buzgan bo‘ladi va uni yangi “iqtisodiy jazolar” kutadi.
Izoh (0)