Ozarboyjonning Binagadi qishlog‘ida g‘amxo‘r qo‘shnilar kechasi oynasi ochiq qolgan mashinaga kleyonka yopishtirib qo‘yishdi. Bu haqda avtomobil egasi Facebook orqali ma’lum qildi, deb yozadi Day.az.
“Ishdan uyga kech qaytib, mashinamni qo‘yishga joy topa olmaganim tufayli qo‘shni uy qarshisida to‘xtashga majbur bo‘ldim, — deb yozadi muallif. — Bu ishim qo‘shnilarga yoqmasligi mumkinligi xayolimdan kechdi, biroq charchaganim uchun tavakkal qildim”.
Avtomobilchi ertalab mashinasiga yaqinlashganida uning oynasiga skotch yordamida kleyonka yopishtirib qo‘yilganini ko‘radi. “Oynani sindirib, mashinani o‘marib, so‘ng uyalmasdan kleyonka ham yopishtirib qo‘yishganidan fig‘onim falakka chiqdi. Biroq mashinaga o‘tirib oynani ko‘targanimdan so‘ng uning bus-butun ekanligini ko‘rdim”, — deya qayd etadi u.
Ma’lum bo‘lishicha, muallif kechasi oynani ko‘tarib qo‘yishni unutgan, mashinani ochiq oyna bilan ko‘rganlar esa uni o‘marishmasliklari uchun kleyonka bilan mahkamlab qo‘yishgan.
Avtomobil egasi o‘z qo‘shnilariga bunday xayrli ishlari uchun minnatdorlik bildirib qolgan.
Izoh (0)