Toshkentning Sirg‘ali tumanida “yengil metro” (tramvay yoki bir relsli liniya) quriladi. Bu haqda Sirg‘ali tumani hokimi Furqat Maqsudxo‘jayevga tayanib Podrobno.uz xabar berdi.
Nashrning eslatishicha, ushbu tumanda metropolitenning yangi tarmog‘ini qurish ishlari bir necha yildan buyon rejalashtirilmoqda. Avvalroq Sirg‘alida metro qurish muhandislik-geologik sharoitlar tufayli mumkin emasligi ma’lum bo‘lgan edi. Shu tufayli loyiha “yengil metro” tizimi bo‘yicha tezyurar elektr transporti liniyasini qurish foydasiga qayta ko‘rib chiqildi.
Furqat Maqsudxo‘jayevning aytishicha, o‘tgan haftada ushbu loyiha ekspertlar bilan muhokama qilingan va yaqin orada bu masalani ko‘tarish rejalashtirilmoqda. “Hozircha natijalar haqida gapirishga erta, ammo biz tuman infratuzilmasini rivojlantirishga jiddiy yondashmoqchimiz”, — dedi u.
Ma’lumot uchun: yengil metro — barcha yo‘llari avtomobil yo‘llaridan to‘liq ajratilgan va bekatlarga ega bo‘lgan, ko‘cha doirasidan tashqaridagi yer ustidagi transport turi.
Izoh (0)