Albaniya bosh vazirining ukasi Serbiya bilan futbol o‘yinida janjal keltirib chiqarishda gumon qilinib hibsga olindi

Albaniya bosh vaziri Edi Ramaning ukasi Orfi Rama Yevropa 2016 chempionatiga saralash musobaqasi doirasidagi Serbiya va Albaniya jamoalari o‘rtasidagi uchrashuv chog‘ida hibsga olindi. Bu haqda Championat.com xabar berdi.

Belgraddagi o‘yin paytida Rama “Partizan” stadioni vip-lojasida bo‘lgan. U Albaniya bayrog‘i bilan bog‘liq hodisaga aloqadorlikda gumon qilinmoqda.

Gap shundaki ushbu uchrashuvda maydon ustida masofadan turib boshqariladigan kichik uchuvchisiz samolyot paydo bo‘ldi. Unga ip yordamida Albaniya bayrog‘i osib qo‘yilgan edi.

Serbiya termasi o‘yinchisi bayroqni yulib olishga uringanidan so‘ng, futbolchilar va jamoalarning boshqa vakillari o‘rtasida mushtlashuv yuzaga keldi. Match to‘xtatib qo‘yildi, so‘ng uning bu kecha davom ettirilmasligi haqida xabar berildi.