Bokschi Briggs motorli qayig‘i bilan Klichkoni suvga ag‘anatdi (video)

Janjalkashligi bilan mashhur bo‘lgan amerikalik bokschi Shennon Briggs IBF, WBA, WBO va IBO versiyalari bo‘yicha jahon chempioni Vladimir Klichko ishtirokida navbatdagi mojaroni keltirib chiqardi, deya xabar bermoqda Sport-express.ru YouTube’ga joylangan videoga asoslanib.

Briggs eshkak eshish bilan shug‘ullanayotgan ukrainalik sportchi yoniga motorli qayiqda borib, “Seni ringda kutaman”, degan  baqiriqlar bilan uning atrofida aylana boshladi. Natijada to‘lqinlar hosil bo‘lib, Klichko muvozanatini yo‘qotdi va suvga ag‘anab tushdi. Shundan so‘ng u Briggsga “chegaradan o‘tib ketgani”ni aytdi.

Nashrning eslatishicha, avvalroq Briggs Klichko ovqatlanayotgan restoranga bostirib kirib, uning qarshisiga o‘tirgan, uni haqoratlab, taomidan olib yegan edi. Klichko esa uning ustidan suv quyib yuborgan. O‘shanda bokschilarni tezda ajratishgani uchun ish mushtlashuvgacha bormagan edi.