Janubiy Afrika Respublikasining Durban shahrida shaxmat bo‘yicha 8—18 yoshli o‘g‘il-qizlar o‘rtasidagi jahon chempionatida so‘nggi 11-tur bahslari bo‘lib o‘tdi. Musobaqada besh nafar iqtidorli shaxmatchi O‘zbekiston sharafini himoya qildi. Bu haqda Olamsport.com xabar berdi.
O‘n yoshgacha bo‘lgan o‘g‘il bolalar bahsida dona surgan jahon chempioni Javohir Sindorov so‘nggi turda qora donalarda hindistonlik Praggnanandxa bilan durang o‘ynadi. Ushbu yosh toifasida qatnashgan yana bir vakilimiz Nodirbek Abdusattorov esa oq donalarda yana bir hind shaxmatchisi Moxan Kushagra bilan murosa ko‘chasini tanladi.
Musobaqa yakuniga ko‘ra, FIDE ustasi bo‘lgan Abdusattorov 8,5 ochko bilan jahon vitse-chempioniga aylandi. To‘qqiz ochko jamg‘argan hindistonlik Nixal Sarin esa ushbu yosh toifasida jahon chempioni bo‘ldi. Sindorov esa 7,5 ochko bilan 7-o‘rinni band etdi.
Afsuski, 12 yoshgacha o‘g‘il bolalar bahsida Nodirbek Yoqubboyev ketma-ket so‘nggi ikki turda mag‘lubiyatga uchrab, sovrinli o‘rinlardan mahrum bo‘ldi. Vaholanki, u musobaqaning katta qismida peshqadamlik qilib kelgandi. Nodirbek 11-turda qora donalarda armanistonlik Shant Sarkisyanga imkoniyatni boy berdi. Yakunda 7,5 ochko bilan 6-pog‘onadan joy oldi.
O‘n to‘rt yoshgacha o‘g‘il bolalar o‘rtasidagi musobaqada qatnashgan Temur Igonin so‘nggi turda qora donalarda eronlik Amin Tabatabayi bilan hisob-kitob qildi va u ham raqibiga bir ochkoni taqdim etdi. Yakunda Temur qo‘shimcha ko‘rsatkichlarga ko‘ra, 7 ochko orqali 14-o‘rin bilan cheklandi.
O‘n olti yoshgacha bo‘lgan qizlar bahsida qatnashgan Bahora Abdusattorova 11-turda rossiyalik Irina Drogovozni mag‘lub etishning uddasidan chiqdi. Lekin bu g‘alaba uning sovrindorlar safidan joy olishiga kamlik qildi. Bahora yakunda 7,5 ochko bilan 8-o‘rinni egalladi.
Izoh (0)