Жанубий Африка Республикасининг Дурбан шаҳрида шахмат бўйича 8—18 ёшли ўғил-қизлар ўртасидаги жаҳон чемпионатида сўнгги 11-тур баҳслари бўлиб ўтди. Мусобақада беш нафар иқтидорли шахматчи Ўзбекистон шарафини ҳимоя қилди. Бу ҳақда Olamsport.com хабар берди.
Ўн ёшгача бўлган ўғил болалар баҳсида дона сурган жаҳон чемпиони Жавоҳир Синдоров сўнгги турда қора доналарда ҳиндистонлик Праггнанандха билан дуранг ўйнади. Ушбу ёш тоифасида қатнашган яна бир вакилимиз Нодирбек Абдусатторов эса оқ доналарда яна бир ҳинд шахматчиси Мохан Кушагра билан муроса кўчасини танлади.
Мусобақа якунига кўра, ФИДЕ устаси бўлган Абдусатторов 8,5 очко билан жаҳон вице-чемпионига айланди. Тўққиз очко жамғарган ҳиндистонлик Нихал Сарин эса ушбу ёш тоифасида жаҳон чемпиони бўлди. Синдоров эса 7,5 очко билан 7-ўринни банд этди.
Афсуски, 12 ёшгача ўғил болалар баҳсида Нодирбек Ёқуббоев кетма-кет сўнгги икки турда мағлубиятга учраб, совринли ўринлардан маҳрум бўлди. Ваҳоланки, у мусобақанинг катта қисмида пешқадамлик қилиб келганди. Нодирбек 11-турда қора доналарда арманистонлик Шант Саркисянга имкониятни бой берди. Якунда 7,5 очко билан 6-поғонадан жой олди.
Ўн тўрт ёшгача ўғил болалар ўртасидаги мусобақада қатнашган Темур Игонин сўнгги турда қора доналарда эронлик Амин Табатабайи билан ҳисоб-китоб қилди ва у ҳам рақибига бир очкони тақдим этди. Якунда Темур қўшимча кўрсаткичларга кўра, 7 очко орқали 14-ўрин билан чекланди.
Ўн олти ёшгача бўлган қизлар баҳсида қатнашган Баҳора Абдусатторова 11-турда россиялик Ирина Дроговозни мағлуб этишнинг уддасидан чиқди. Лекин бу ғалаба унинг совриндорлар сафидан жой олишига камлик қилди. Баҳора якунда 7,5 очко билан 8-ўринни эгаллади.
Изоҳ (0)