22-sentabr, dushanba kuni holatiga ko‘ra Toshkentning Bunyodkor maydoni atrofidagi chorrahalarda rekonstruksiya ishlari olib borilmoqda.
“Daryo” muxbiri xabariga ko‘ra, O‘zbekiston shoh ko‘chasining Furqat ko‘chasi va Bunyodkor shoh ko‘chasi bilan kesishgan qismlari kengaytirilmoqda.
O‘zbekiston shoh ko‘chasining Furqat ko‘chasi va Bunyodkor shoh ko‘chasi bilan kesishgan qismidagi yashil zona kichraytirilib, avtomobillar uchun ikkita qo‘shimcha yo‘lak barpo etilmoqda.
Bunyodkorlik ishlari davomida chorrahalardagi ayrim svetoforlar demontaj qilingan, qolgan svetoforlar esa ishlamayapti. Avtomobillar harakatini YHXBB inspektorlari boshqarib turibdi.
Svetoforlar ishlamayotgani sababli chorrahalarda tirbandlik kuzatilmoqda.
Bunyodkorlik ishlari olib borilayotgani sababli piyoda va avtomobillar harakatlanishida ba’zi noqulayliklar kuzatilmoqda.
Vaqtni tirbandliklarda sarflamaslik uchun avtomobilchilarga kunning tig‘iz paytlarida ushbu chorrahadan foydalanmaslikni tavsiya etamiz.
Ta’kidlash joiz, ushbu xayrli ish haqida Toshkent shahar hokimligi saytida ma’lumot berilmagan. Hokimlik saytidagi so‘nggi xabar bugun, 23-sentabr kuni kiritlgan “Muhim tarbiya maskani” bo‘lib, u O‘zbek Milliy akademik drama teatriga bag‘ishlangan.
Toshkent shahar hokimiyati huzuridagi obodonlashtirish bosh boshqarmasi va “ToshkentboshplanLITI” DUK vakillari bu qurilish haqida ma’lumot bermadi.
Izoh (0)