28-avgust kuni Oliy liganing 18-turidan o‘rin olgan “Lokomotiv” va “Bunyodkor” jamoalari o‘rtasidagi o‘yin bo‘lib o‘tdi, deb xabar bermoqda Stadion.uz.
O‘yinning ilk daqiqalaridan jamoalar ochiq futbol namoyish qila boshladi. Hech bir jamoa himoyaga yotib olmadi. “Lokomotiv” raqibning oldinga o‘tishini kutmagan shekilli, ko‘p vaziyatlarda orqa chiziqni bo‘sh qoldiraverdi. Shu bois, “qaldirg‘ochlar”ning qarshi hujumlari xavfliroq ko‘rinish ola boshladi. O‘yinning 19-daqiqasiga kelib, hisobni aynan Lushan shogirdlari ochdi. Sardor Rashidov tomonidan o‘ng qanotdan yetkazilgan to‘pga jarima maydonchasi ichida turgan Bekrich muvaffaqiyatli zarba bera olmadi. To‘p uning oyog‘iga tegib, yuqori ko‘tarildi va O‘rinboyev to‘pni yerga tushirmay, 12—13 metrda Nesterov darvozasini ishg‘ol qildi. Bu vaziyatda “Lokomotiv” himoyachilari har ikkala hujumchini qarovsiz qoldirgandi.
Birinchi bo‘lim yakuniga yaqin Valentin Kovalenko jarima maydonchasi ichida Farhod Tojiyevga nisbatan ishlatilgan qo‘pollik uchun penalti belgiladi. Jabrlanuvchining o‘zi jarima zarbasini aniq amalga oshirdi va hisobni tenglashtirdi.
Ikkinchi bo‘limda Lushan shogirdlari ancha aqlli o‘yin namoyish qildi va o‘yinda ustunlikka ega bo‘ldi. Ular qarshi hujumlarda bir qator imkoniyatlarga ega bo‘ldi. G‘alaba to‘pi esa jarima to‘pidan keyin kiritildi. Rashidov jarima zarbasidan to‘pni yuqorilatib jarima maydonchasiga uzatdi. To‘p rekoshet holatida Miloshevichga kelib tushdi va Ivan yaqin masofadan darvozani ishg‘ol qildi. To‘p darvoza ustuniga tegib, darvoza to‘riga borib tushdi.
O‘yin oxirlarida Abramov shogirdlari bosimni kuchaytirdi, ammo “qaldirg‘ochlar” g‘alabani saqlab qoldi. Shu tariqa, “Lokomotiv” mavsumdagi ilk mag‘lubiyatini qabul qilib oldi.
Oliy Liga — 2014, 18-tur
“Lokomotiv” — “Bunyodkor”: 1:2
Gollar: Farhod Tojiyev (41-pen.) — Zabihillo O‘rinboyev (19), Ivan Miloshevich (69)
“Lokomotiv”: 1. Ignatiy Nesterov, 10. Farhod Tojiyev, 17. Salim Mustafoyev, Fozil Musayev, 20. Islom To‘xtaxo‘jayev, 24. Ibrohim Rahimov, 35. Shavkat Mullajonov, 50. Aleksandr Geynrix, 61. Dilshod Rahmatullayev, 77. Jasur Hasanov (kattasi), 88. Lutfulla To‘rayev.
Zaxira: 84. Temur Jo‘rayev, 4. Boburbek Yo‘ldoshev, 7. Sadriddin Abdullayev, 22. Viktor Karpenko, 23. Ivan Nagayev, 60.Artyom Filiposyan, 70. Alisher Shog‘ulomov.
“Bunyodkor”: 45. Akbar To‘rayev, 2. Akmal Shorahmedov, 4. Xayrulla Karimov (S), 6. Anvar G‘ofurov, 8. Javlon Ibrohimov, 9. Minori Sato, 13. Ivan Miloshevich, 19. Zabihillo O‘rinboyev, 20. Samir Bekovich, 21. Sardor Rashidov, 28. Dostonbek Hamdamov.
Zaxira: 1. Pavel Bugalo, 11. Aleksandr Pishur, 14. Vohid Shodiyev, 27. Sardor Sobirxo‘jayev, 33. Oleg Zoteyev, 48. Akramjon Komilov, 59. Nuriddin Hasanov
Hakamlar: V. Kovalenko, M. Saidqosimov, H. Shodmonov, R. Tolibjonov
Nazoratchi: G‘. Karimov
Izoh (0)