O‘zbekiston Respublikasi qonunchiligiga muvofiq respublikaning 18 yoshga to‘lmagan fuqarolari uchun MDH mamlakatlari (Rossiya, Ukraina, Ozarboyjon, Qozog‘iston, Qirg‘iziston)ga chiqish tartibi belgilandi, deb yozadi “O‘zbekiston havo yo‘llari” MAK matbuot xizmati.
Unga muvofiq, 16 yoshga to‘lmagan O‘zbekiston Respublikasi fuqarosi biometrik pasportga ega bo‘lgan holda katta yoshli kuzatuvchi hamrohligida MDH mamlakatlariga chiqishi mumkin. Bunda katta yoshli kuzatuvchi voyaga yetmagan shaxsning biometrik pasportida ko‘rsatilgan bo‘lishi kerak.
O‘zbekiston Respublikasining 16 yoshga to‘lmagan fuqarosi o‘z biometrik pasportida “Hamrohlik qiluvchi shaxs” muhri bilan ko‘rsatilgan voyaga yetgan shaxs hamrohligida MDH davlatlariga chiqishi mumkin. Ushbu muhr O‘zbekiston Respublikasi Ichki ishlar vazirligi Kirish-chiqish va fuqarolikni rasmiylashtirish boshqarmasi organlari tomonidan bosiladi va dumaloq gerbli tamg‘a bilan tasdiqlangan bo‘lishi kerak.
Shuningdek, 15 yoshga to‘lmagan O‘zbekiton Respublikasi fuqarolari MDH davlatlariga biometrik pasportga ega bo‘lgan holda, ota-ona yoki vasiylarning “O‘zbekiston havo yo‘llari” Milliy aviakompaniyasi nomiga notarial tasdiqlangan ruxsati bilan katta kishi hamrohligisiz chiqishi mumkin.
O‘zbekiston Respublikasining 15 yoshdan 18 yoshgacha bo‘lgan fuqarosi biometrik pasportga ega bo‘lgan holda, ota-ona yoki vasiylarning mustaqil chiqish uchun notarial tasdiqlangan ruxsati bilan MDH davlatlariga chiqishi mumkin.
Izoh (0)