Futbol ishqibozi “Sport” telekanaliga YeChL va Yevropaning kuchli beshlik chempionatlari translyatsiyasi uchun pul yig‘ib berishni taklif qildi

O‘zbekistonlik futbol ishqibozlaridan biri Uff.uz saytiga maktub yo‘llab, unda “Sport” telekanaliga YeChL va Yevropaning kuchli beshlik chempionatlarini translyatsiya qilish borasida taklif bildirdi:

“Assalomu alaykum hurmatli Uff.uz portali ijodkorlari!

Men Sa’dullayev Firdavs Bahodirovich, Samarqand viloyati Tayloq tumanidanman. Sizlarga ushbu xatni yozishimdan maqsad, ‘Sport’ telekanaliga ayrim takliflarim bor.

Sizlardan iltimos, mening ushbu xatimni o‘z saytlaringizga joylashtirsangiz. Futbol ishqibozlarining fikrini bilmoqchiman.

Men birinchi o‘rinda ‘Sport’ telekanali ijodkorlariga JCh — 2014’ni to‘liq translyatsiyasi uchun minnatdorchilik bildiraman. Albatta, har bir futbol ishqibozi uchun YeChL va Yevropaning kuchli beshlik chempionatlari (Ayniqsa, APL men uchun) o‘yinlarini to‘g‘ridan-to‘g‘ri jonli efirda kuzatish katta quvonch bag‘ishlaydi.

Internet saytlari va ommaviy axborot vositalarida keltirilgan so‘nggi xabarlarga ko‘ra, bugungi kunda ‘Sport’ telekanali ushbu chempionatlar translyatsiyasini olib berish bo‘yicha muzokaralar o‘tkazmoqda. Ushbu muzokaralarda ‘Sport’ telekanali ijodkorlariga muvaffaqiyat tilayman.

Bizga ma’lumki, bu translyatsiya huquqini qo‘lga kiritishning o‘zi oson kechmaydi, albatta, mablag‘ masalasida. Shu masalada sizlarga bir taklifim bor.

TAKLIF!

Bugungi kunda bizning respublikamizda 30 milliondan ziyod aholi mavjud. Mazkur aholidan bir millioni futbolga qiziqadi, deb hisoblasak ‘Sport’ telekanali tomonidan bir aksiya tashkil qilinsa. Deylik, O‘zMTRK nazorati ostida Markaziy bankda alohida hisob raqam ochilib, mazkur hisob raqamga futbol ishqibozlari tomonidan YeChL va Yevropaning kuchli beshlik chempionatlari translyatsiyasi huquqini sotib olish uchun ixtiyoriy homiylik mablag‘lari jamlansa va translyatsiya huquqini sotib olishga yo‘naltirilsa.

Oddiy arifmetik yo‘l bilan hisoblaganda har bir futbol ishqibozi 5000 so‘mdan (ushbu miqdor, menimcha, hozirgi kunda hech kimga og‘irlik qilmaydi) tashlagan taqdirda besh milliard so‘m (ishonamanki, bundan ko‘proq mablag‘ yig‘iladi) mablag‘ jamg‘ariladi.

O‘ylaymanki, ushbu mablag‘ yuqorida keltirilgan musobaqalar translyatsiyasi huquqini qo‘lga kiritishga yetadi. Bu esa O‘zbekistondagi millionlab futbol ishqibozlarining quvonchiga sabab bo‘ladi.

Hurmat bilan Firdavs Sa’dullayev”