Футбол ишқибози «Спорт» телеканалига ЕЧЛ ва Европанинг кучли бешлик чемпионатлари трансляцияси учун пул йиғиб беришни таклиф қилди

Ўзбекистонлик футбол ишқибозларидан бири Uff.uz сайтига мактуб йўллаб, унда «Спорт» телеканалига ЕЧЛ ва Европанинг кучли бешлик чемпионатларини трансляция қилиш борасида таклиф билдирди:

«Ассалому алайкум ҳурматли Uff.uz портали ижодкорлари!

Мен Саъдуллаев Фирдавс Баҳодирович, Самарқанд вилояти Тайлоқ туманиданман. Сизларга ушбу хатни ёзишимдан мақсад, ‘Спорт’ телеканалига айрим таклифларим бор.

Сизлардан илтимос, менинг ушбу хатимни ўз сайтларингизга жойлаштирсангиз. Футбол ишқибозларининг фикрини билмоқчиман.

Мен биринчи ўринда ‘Спорт’ телеканали ижодкорларига ЖЧ — 2014’ни тўлиқ трансляцияси учун миннатдорчилик билдираман. Албатта, ҳар бир футбол ишқибози учун ЕЧЛ ва Европанинг кучли бешлик чемпионатлари (Айниқса, APЛ мен учун) ўйинларини тўғридан-тўғри жонли эфирда кузатиш катта қувонч бағишлайди.

Интернет сайтлари ва оммавий ахборот воситаларида келтирилган сўнгги хабарларга кўра, бугунги кунда ‘Спорт’ телеканали ушбу чемпионатлар трансляциясини олиб бериш бўйича музокаралар ўтказмоқда. Ушбу музокараларда ‘Спорт’ телеканали ижодкорларига муваффақият тилайман.

Бизга маълумки, бу трансляция ҳуқуқини қўлга киритишнинг ўзи осон кечмайди, албатта, маблағ масаласида. Шу масалада сизларга бир таклифим бор.

ТАКЛИФ!

Бугунги кунда бизнинг республикамизда 30 миллиондан зиёд аҳоли мавжуд. Мазкур аҳолидан бир миллиони футболга қизиқади, деб ҳисобласак ‘Спорт’ телеканали томонидан бир акция ташкил қилинса. Дейлик, ЎзМТРК назорати остида Марказий банкда алоҳида ҳисоб рақам очилиб, мазкур ҳисоб рақамга футбол ишқибозлари томонидан ЕЧЛ ва Европанинг кучли бешлик чемпионатлари трансляцияси ҳуқуқини сотиб олиш учун ихтиёрий ҳомийлик маблағлари жамланса ва трансляция ҳуқуқини сотиб олишга йўналтирилса.

Оддий арифметик йўл билан ҳисоблаганда ҳар бир футбол ишқибози 5000 сўмдан (ушбу миқдор, менимча, ҳозирги кунда ҳеч кимга оғирлик қилмайди) ташлаган тақдирда беш миллиард сўм (ишонаманки, бундан кўпроқ маблағ йиғилади) маблағ жамғарилади.

Ўйлайманки, ушбу маблағ юқорида келтирилган мусобақалар трансляцияси ҳуқуқини қўлга киритишга етади. Бу эса Ўзбекистондаги миллионлаб футбол ишқибозларининг қувончига сабаб бўлади.

Ҳурмат билан Фирдавс Саъдуллаев»