Donetsk viloyatida o‘tgan sutkalar davomida harbiy harakatlar natijasida 34 nafar tinch aholi vakillari halok bo‘ldi, yana 29 nafari yaralandi, deya xabar berdi Euronews.
Donetskdan 35 kilometr masofadagi Ilovayskda Ukraina qo‘shinlari, ba’zi xabarlarga ko‘ra shaharning yarmini, boshqa ma’lumotlarga ko‘ra, butun shaharni egallab oldi. Milliy gvardiya ayirmachilarning tanklar va artilleriya yordamida qarshi hujumlar uyushtirayotganini, natijada 9 harbiy xizmatchi halok bo‘lgani haqida xabar qilmoqda.
Janglar Makeyevka shahrida ham davom etmoqda. U yerda artilleriya snaryadi kelib tushishi natijasida kimyo zavodi yonib ketgan.
Donetskdagi vaziyatdan aziyat chekib, u yerni tark etayotganlar soni oshib bormoqda. Ukraina janubi-sharqidan ko‘pchilik Rostov viloyatiga qochmoqda.
BMT ma’lumotlariga ko‘ra, oylab davom etayotgan nizolar davomida Rossiya Federatsiyasiga 700 ming ukrainalik qochoqlar ketgan bo‘lishi mumkin, ularning atigi 168 ming nafari rasmiy ro‘yxatdan o‘tgan. Rossiya jamoatchilik palatasi esa qochoqlar soni bir millionga yaqinlashib qolganini taxmin qilmoqda.
Izoh (0)