KXDR davlat mudofaa qo‘mitasi AQSh davlat kotibi Jon Kerriga tanqid toshlari otdi va uni “qo‘y terisiga burkangan bo‘ri” deb atadi. Bu haqda Janubiy Koreyaning Yonhap agentligi xabar berdi.
Qo‘mitaning siyosat departamenti Amerika diplomatiyasi rahbarini yosh bolalarga xos xatti-harakatlarda aybladi. Shimoliy Koreyaga qarata goh tahdid qilish, goh yarashish taklifini kiritish kattalarga xos ish emasligi ta’kidladi.
Associated Press aniqlik kiritishicha, yaqinda AQSh va Janubiy Koreya navbatdagi harbiy o‘quv mashqlarini boshlagan bo‘lsa-da, davlat kotibi Koreya yarim orolida tinchlik o‘rnatilishini yoqlab chiqqan.
“Kerrining xatti-harakatlari yana bir marta amerikacha ikkiyuzlamachilikni ko‘rsatib berdi”, — deyiladi KXDR davlat qo‘mitasi vakili bayonotida. Uning so‘zlariga ko‘ra, AQSh “hiyla-nayranglarning barcha turlaridan foydalanib, insoniyatni aldaydi va ustidan kuladi”.
Shimoliy Koreya avval ham bunday haqoratli bayonotlar bilan chiqish qilgan. Aprel oyida AQSh prezidenti Seulga tashrif buyurib, ikki davlat Shimoliy Koreyani to‘rtinchi yadro sinovini o‘tkazish niyatidan qaytish haqida ogohlantirgach, KXDR Koreya Respublikasi prezidentini fohisha, Oq uy rahbari Barak Obamani esa qo‘shmachiga tenglashtirgan edi.
Izoh (0)