Kaftga taqiladigan va klaviaturasiz yozish imkonini beruvchi qurilma konsepti yaratildi

Planshet va smartfonlarda yozish noqulay va kichik ekranda yozish ko‘plab xatoliklarga olib keladi. Ushbu muammoni hal etish maqsadida Texasda yangi startap o‘z ishini boshladi. Bu haqda Mashable nashri xabar berdi.

Startap ishlab chiqmoqchi bo‘lgan qurilma AirType deb nomlanadi va uni “klaviaturasiz klaviatura” deyish mumkin. U kaftga taqiladi va istalgan yuza yoki yuza bo‘lmagan joylarda ham xuddi klaviaturada yozgandek yozilaveriladi.

AirType hech qanday virtual klaviatura surati yoki biror tasvir ko‘rsatmaydi. U ikki kaftga taqilgan qurilma sensorlari yordamida barmoq harakatlarini kuzatib ishlaydi. Bunda barmoqlar klaviatura tugmalarini bosgandek harakat qiladi va qurilma barmoq qaysi tugmaga tekkani yoki tegishini sezadi. AirType bilan ishlash uchun klaviatura tugmalari qay tartibda joylashganini bilish zarur bo‘ladi.

Shuningdek, qurilma sizning klaviaturada yozishdagi odatlaringizga moslasha oladi. Bu xuddi biror gadjetni ovozingizga moslashtirishga o‘xshaydi. AirType xatolarni to‘g‘rilaydigan va so‘zlarni oldindan aniqlaydigan maxsus dasturga ega bo‘ladi.