Apple’ni Finlyandiya iqtisodiyotini xarob qilishda ayblashdi

Finlyandiya bosh vaziri Aleksandr Stubb Apple korporatsiyasi va uning sobiq bosh direktori Stiv Jobsni mamlakatda ish o‘rinlarining qisqarishi va iqtisodiyotning yemirilishida aybladi. Bu haqda bosh vazir Dagens Industri gazetasiga bergan intervyusida aytib o‘tdi, deya xabar berdi “Rossiyskaya gazeta”.

Stubb fikricha, Finlyandiya mehnat bozorining tayanchi bo‘lmish Nokia kompaniyasi va qog‘oz sanoati Apple mahsulotlari mamlakatga kirib kelishi bilan inqirozga yuz tutgan. “iPhone chiqqach, Nokia’ga talab umuman kamayib ketgan bo‘lsa, iPad tufayli odamlar qog‘oz sotib olmay qo‘ydi. Stiv Jobs xalqni ish o‘rinlaridan ayirdi”, — dedi u.

Apple’ning ayni paytdagi rahbari Tim Kuk Nokia’ning muvaffaqiyatsizlikka uchrashiga nisbatan boshqacharoq fikr bildirgan edi. Uning so‘zlariga ko‘ra, Nokia yetarlicha innovatsion bo‘lmagan. “Innovatsiyalarni joriy etmaslik biznesning ‘o‘limi’ga olib keladi”, — dedi u.