Toshkentda Sony Xperia Z1 Compact smartfoni 30 foizga arzonlashib, 1,2 mln so‘mdan sotilmoqda

O‘zbekistonda sotila boshlaganidan buyon Sony Xperia Z1 Compact smartfoni narxi deyarli 30 foizga arzonlashdi. Bu haqda Mobinfo.uz xabar berdi.

Yapon kompaniyasining o‘tgan yilgi flagman smartfoni bo‘lmish Sony Xperia Z1’ning mini versiyasi Toshkentdagi “Fleshka” savdo majmuasida mart oyining o‘rtalarida 1,7 million so‘mga sotila boshlagan edi.

Ayni paytda uning narxi 1,2 million so‘mga tushib ketgan. Sony Xperia Z1’ning o‘zi esa 1 million so‘mdan sotilmoqda.

Eslatib o‘tamiz, Sony Xperia Z1 Compact chang va namlikdan IP55/IP58 standarti bo‘yicha himoyaga egadir. U 1,5 metr chuqurlikdagi suvda 30 daqiqagacha turishi mumkin, bunda unga hech qanday ziyon yetmaydi.

Telefon 4,3 dyuymli 1280×720 o‘lchamli HD-displey, Qualcomm Snapdragon 800 to‘rt yadroli protsessor, 2 Gb li tezkor xotira va 16 Gb li ichki xotiraga ega. Unga 64 Gb gacha hajmda microSD o‘rnatish mumkin.

Asosiy kamerasi 20,7 megapiksel, old kamerasi 2 megapiksel.

Sony Xperia Z1 Compact Android 4.3 Jelly Bean operatsion tizimida ishlaydi. GPS, Bluetooth 4.0, Wi-Fi 802.11a/b/g/n/ac, microUSB 2.0, NFC’ni ko‘tara oladi.

Smartfon 127×65×9,4 mm o‘lchamga ega, og‘irligi 140 grammni tashkil qiladi.