Facebook ijtimoiy tarmog‘i asoschisi Mark Sukerberg The Wall Street Journal gazetasi uchun internetga ulanishning ochiqligi haqida maqola yozdi. Unda tadbirkor texnologik yetakchilarning asosiy vazifasi — har bir kishiga internetni yetkazib berishdan iboratligini ta’kidladi. Bu haqda “Novaya gazeta” nashri xabar berdi.
“Kishilarda internetga ulanish imkoniyati bo‘lsa, ular nafaqat o‘z do‘stlari, oilalari va hamjamiyatlar bilan bog‘lanadi, balki global iqtisodiyotda ham ishtirok etishadi”, — deb yozadi Sukerberg.
Bugungi kunda dunyo ahlining uchdan bir qismigina yoki 2,7 milliard kishi internetga ulanish imkoniga ega. Internetga ulanishning o‘sishi ham yiliga 9% ko‘rsatkich bilan juda sekin bormoqda.
Sukerberg texnologiyalar sohasidagi ba’zi yetakchilar, jumladan Facebook tomonidan ishga tushirilgan Internet.org loyihasi haqida gapirib berar ekan, u operatorlar bilan dunyo bo‘yicha bepul bazaviy internet taqdim etish bo‘yicha ish olib borishga qaratilganini ta’kidladi.
“Dunyo bo‘ylab 911 xizmatiga qo‘ng‘iroq qilish bepul bo‘lgani kabi, kelajakda internetdan foydalanish ham ana shunday to‘lov talab etilmaydigan xizmatga aylanadi”, — dedi u.
Izoh (0)