13-iyul, yakshanba kuni Toshkentdagi “Lokomotiv” istirohat bog‘idagi attraksionlardan birida nosozlik sodir bo‘ldi. Attraksiondagi uchar samolyotlardan biri pastga tushish o‘rniga tepada qolib ketdi. Bu haqda Facebook’dagi “Potrebitel.uz” guruhi a’zolaridan biri ma’lum qildi.
Foydalanuvchi ilova qilgan suratda samolyotcha ichida bolakay va uning buvisi borligini ko‘rish mumkin. “Ularni yarim soat deganda bog‘ texniklari zo‘rg‘a pastga tushirishdi”, — deb yozadi u.
Postga turli his-tuyg‘ularga to‘la fikrlar bildirildi. Kimdir “hechqisi yo‘q, bunaqasi bo‘lib turadi”, — deb yozgan bo‘lsa, yana kimdir boshqa hech qachon attraksionlarga chiqmasligini, suratni ko‘rib yuragi yorilayozganini qayd etgan.
Foydalanuvchilardan biri ayb bog‘ning o‘zida emasligini, qolgan istirohat bog‘larida ham bunday voqealar tez-tez sodir bo‘lib turishini aytgan. Kimdir esa ushbu parkda ishlaydigan tanishlari borligini yozib, u yerda har kuni texnik ko‘rik o‘tkazilishini ta’kidlagan.
Izoh (0)