Butun dunyoga mashhur Flappy Bird o‘yinining o‘zbekcha talqini sifatida e’tirof etish mumkin bo‘lgan “Uchar ketmon” dasturi Android smartfon va planshet egalari uchun ham chiqdi. Bu haqda “Uchar ketmon”ning Facebook’dagi sahifasida ma’lumot berilgan.

“Kun”ning yozishicha, “Uchar ketmon” o‘yini Google Play onlayn-do‘koniga 3-iyul kuni joylashtirilgan. Hozirgacha uni 500—1000 marta ko‘chirishgan. Tez orada o‘yin ichida to‘plangan natijani Facebook orqali namoyish etish imkonini beruvchi tugma qo‘shilishi rejalashtirilmoqda.

Eslatib o‘tamiz, Flappy Bird’dan ilhom olib ishlab chiqilgan, biroq “Flappy Bird’ga dam beruvchi” “Uchar ketmon” o‘yini avvalroq iOS operatsion tizimida ishlovchi smartfon va planshetlar – iPhone va iPad uchun chiqarilgan edi. Dastur bir haftadan beri App Store’ning O‘zbekiston segmentida ko‘chirib olishlari soni bo‘yicha peshqadamlikni hech kimga bermay kelmoqda.

O‘yin mashhur Flappy Bird o‘yini hamda o‘zbek kinosi xazinasiga aylangan komediya filmlar (jumladan, “Abdullajon”)ga asoslangan bo‘lib, uchar ketmon mingan kishi to‘siqlar orasiga yig‘ilgan so‘mlarni (5 ming so‘mliklar) yig‘ib chiqishi kerak.

Foydalanuvchi so‘mlarni yig‘ish vaqtida to‘siqqa urilib yutqazsa, “Abdullajon” filmidagi Bozorvoy va boshqa obrazlardan “Sigir desam, mol ekansan-ku!”, “Ha, Oytovog‘-a!” va boshqa shu kabi ovozlar, agar ko‘p pul yig‘sa, “Millioner bo‘pketdim-a!” kabi ovozi eshitiladi. O‘yin davomida filmlardan olingan boshqa iqtiboslarni ham eshitish mumkin.