Britaniyaning atrof-muhit masalalariga ixtisoslashgan The Earth Times internet-jurnali Orol dengizi muammolariga bag‘ishlangan “Markaziy Osiyoda ekologik muammolar” nomli maqolani chop etdi.
Maqolada Orol fojiasi bo‘yicha faktlar keltirilgan bo‘lib, jumladan, bu yerda avval yashagan baliq turlarining ko‘pchiligi qirilib ketgani, Mo‘ynoq kabi chegaradosh hududlarda esa hayotni ta’minlash tizimi izdan chiqqani ta’kidlangan. Orol dengizi qurishda davom etayotgani tufayli, ushbu oqibatlarga barham berish qiyinchilik tug‘dirmoqda.
Jurnal O‘zbekiston va qo‘shni davlatlar xalqaro jamoatchilik ko‘magiga ehtiyoj sezayotganini qayd etgan. 2010-yilda BMT Bosh kotibi Pan Gi Mun zarar ko‘rgan hududga tashrifi chog‘ida Orol dengizi muammosining dunyodagi eng dahshatli ekologik fojialardan biri ekanini ta’kidlab, muammoni hal etish uchun butun dunyoni jalb qilish zaruriyati borligini aytgan. BMT agentligi O‘zbekistonda 2012—2015-yillarda “Orol dengizi krizisidan azob chekkan aholi hayot faoliyatini ta’minlash” dasturini amalga oshirmoqda.Shuningdek maqolada BMT Taraqqiyot dasturi ham bu borada O‘zbekiston bilan hamkorlik qilayotgani, natijada 2001—2011-yillarda hududda bolalar o‘limi ikki marta kamaygani, biroq shunday bo‘lsa-da, Orolbo‘yi hududlardagi bolalar salomatligi xavf ostidaligi ta’kidlangan.
Muallif O‘zbekistonda Orol qurishining salbiy oqibatlariga qarshi 1990-yildan buyon yuzdan ortiq dastur va loyihalar olib borilganini yozgan. Orol bo‘yida 5,5 million gektar maydonni egallagan Orolqum tuz cho‘li vujudga kelgan, deb yozadi u. Yiliga Oroldan havoga 75 million tonnadan ziyod zaharli chang ko‘tariladi. U Pomir, Tyan-Shan va hatto Arktika muzlarida borligi aniqlangan.
Izoh (0)