2014-yil 1-aprel kuni “O‘zbekturizm” Milliy kompaniyasida Turkiya Respublikasining O‘zbekiston Respublikasidagi Favqulodda va Muxtor Elchisi Namik Guner Erpul bilan uchrashuv bo‘lib o‘tdi. Bu haqda “O‘zbekturizm” matbuot markazi xabar berdi.
Turk tomoni tashabbusi bilan tashkil qilingan uchrashuv chog‘ida O‘zbekiston va Turkiya o‘rtasida sayyohlik sohasidagi hamkorlik masalalari ko‘rildi.
Bundan tashqari, turizm sektoriga TICA tomonidan texnik hamkorlikni, to‘g‘ridan-to‘g‘ri investitsiyalarni jalb etish, kadrlar tayyorlash bo‘yicha fikr almashildi.
Namik Guner Erpulning ta’kidlashicha, o‘tgan yili Turkiyadan dunyoning turli mamlakatlariga jami 75 million kishi sayohat qilgan. “Ushbu tashriflarning 1 foizi O‘zbekistonga yo‘naltirilsa, bu ikki mamlakat o‘rtasidagi sayyohlar oqimining keskin o‘sishiga sabab bo‘ladi”, — dedi u.
Shuningdek, Turkiya elchisi “O‘zbekiston havo yo‘llari” MAK ning Toshkent—Istanbul yo‘nalishidagi aviareyslarini ko‘paytirish zaruriyati haqida gapirdi. U yana Turkiyani Samarqand, Buxoro shaharlari bilan bog‘lovchi to‘g‘ridan-to‘g‘ri reyslar tashkil qilish taklifi bilan chiqdi.
Muzokaralar chog‘ida ko‘rilgan masalalardan yana biri har ikkala mamlakatdagi turizm sohasi vakillari va talabalari uchun Turkiya va O‘zbekistonga infoturlar tashkil qilish bo‘ldi.
Izoh (0)