Ayni paytda “Bilayn” interneti butun O‘zbekiston bo‘ylab ishlamayapti. Bu haqda kompaniyaning onlayn qo‘llab-quvvatlash xizmatida ma’lum qilishdi, deb yozadi “Kun” nashri.
“Bilayn-O‘zbekiston” aloqa operatorining internet xizmati 3-aprel, payshanba kuni Toshkent vaqti bilan 19:50 atrofida ishlamay qoldi. Ayni vaqtda, qo‘ng‘iroqlar va SMS xizmati odatdagidek ishlashda davom etmoqda. Ushbu xabar yozilayotgan vaqtda ijtimoiy tarmoqlarda noodatiy sokinlik kuzatilayotgan edi.
@muhrim лента сустку. Билайн-интернет ишламаяптийкан шекилли?
— Азиз Қаршиев (@timonus23) April 3, 2014
Kompaniya rasmiylari hozircha ushbu holat bo‘yicha izoh yoki tushuntirish bergani yo‘q. “Bilayn-O‘zbekiston” matbuot xizmati xodimlari telefonini ko‘tarmayapti yoki telefoni o‘chiq.
“Keltirilgan noqulayliklar uchun uzr so‘raymiz. Ayni vaqtda mutaxassislarimiz ushbu muammoni bartaraf etish ustida ishlashmoqda. Internet xizmati tez orada tiklanadi”, – deya ma’lumot berishdi kompaniya onlayn qo‘llab-quvvatlash xizmatida.
Ayni vaqtda, mamlakatning boshqa bir yirik aloqa operatori – Ucell abonentlarida internetga kirish bilan bog‘liq muammo yo‘qligi aytilmoqda.
Ma’lumot uchun, “O‘zbektelekom” va boshqa internet provayderlar Rossiya hududidagi avariyaviy ishlar munosabati bilan, 3-aprel, payshanba kuni soat 00:00 dan 06:00 gacha internet xizmati sifati yomonlashishi mumkinligini ma’lum qilgandi.
Qo‘shimcha (21:45): Kompaniyaning Jamoatchilik bilan aloqa xizmati rahbari Oraz Abdurazzoqovning telefon orqali “Daryo”ga bergan intervyusida “Bilayn”ning ba’zi tarmoqlarida nosozlik yuz berganligini ta‘kidladi. U muammo ustida “Bilayn” texnik mutaxassislari ishlayotgani va nosozlik tez orada hal qilinishini ma’lum qildi.
Izoh (0)