Айни пайтда «Билайн» интернети бутун Ўзбекистон бўйлаб ишламаяпти. Бу ҳақда компаниянинг онлайн қўллаб-қувватлаш хизматида маълум қилишди, деб ёзади «Кун» нашри.
«Билайн-Ўзбекистон» алоқа операторининг интернет хизмати 3 апрел, пайшанба куни Тошкент вақти билан 19:50 атрофида ишламай қолди. Айни вақтда, қўнғироқлар ва СМС хизмати одатдагидек ишлашда давом этмоқда. Ушбу хабар ёзилаётган вақтда ижтимоий тармоқларда ноодатий сокинлик кузатилаётган эди.
@muhrim лента сустку. Билайн-интернет ишламаяптийкан шекилли?
— Азиз Қаршиев (@timonus23) April 3, 2014
Компания расмийлари ҳозирча ушбу ҳолат бўйича изоҳ ёки тушунтириш бергани йўқ. «Билайн-Ўзбекистон» матбуот хизмати ходимлари телефонини кўтармаяпти ёки телефони ўчиқ.
«Келтирилган ноқулайликлар учун узр сўраймиз. Айни вақтда мутахассисларимиз ушбу муаммони бартараф этиш устида ишлашмоқда. Интернет хизмати тез орада тикланади», – дея маълумот беришди компания онлайн қўллаб-қувватлаш хизматида.
Айни вақтда, мамлакатнинг бошқа бир йирик алоқа оператори – Уcелл абонентларида интернетга кириш билан боғлиқ муаммо йўқлиги айтилмоқда.
Маълумот учун, «Ўзбектелеком» ва бошқа интернет провайдерлар Россия ҳудудидаги авариявий ишлар муносабати билан, 3 апрел, пайшанба куни соат 00:00 дан 06:00 гача интернет хизмати сифати ёмонлашиши мумкинлигини маълум қилганди.
Қўшимча (21:45): Компаниянинг Жамоатчилик билан алоқа хизмати раҳбари Ораз Абдураззоқовнинг телефон орқали «Дарё»га берган интервюсида «Билайн»нинг баъзи тармоқларида носозлик юз берганлигини таъкидлади. У муаммо устида «Билайн» техник мутахассислари ишлаётгани ва носозлик тез орада ҳал қилинишини маълум қилди.
Изоҳ (0)