Artel smartfonlarining texnik xususiyatlari e’lon qilindi

Artel savdo belgisi Sport, Race, Sprint mobil telefonlari va Adi 5S hamda Perfect1 smartfonlarini taqdim etgani haqida avval xabar bergan edik.

“Mobinfo.uz” nashri ushbu smartfonlarning texnik xususiyatlarini e’lon qildi.

Artel Perfect1 ikki simkartali smartfon bo‘lib, Jelly Bean Android 4.2.2 operatsion tizimida ishlaydi. 4,7 dyuymli 1280×720 o‘lchamdagi ekranga ega.

Smartfon 4 Gb ichki va 1 Gb tezkor xotira bilan ta’minlangan. 32 GB gacha tashqi xotira kartasini o‘rnatish mumin. 8 va 2 megapikselli orqa va old kameralari bor.

Artel Perfect1 oq va qora korpuslarda taqdim etiladi. Telefonning o‘lchami 134×68×7,9 mm. Og‘irligi 122 gramm.

Smartfon mini-USB simi, naushnik, kafolat taloni (kafolat va bepul xizmat 1 yilga), foydalanish ko‘rsatmalari kitobchasi bilan birga sotiladi.

Artel Adi 5S smartfoni Perfect1 dan ekran o‘lchami bilan farqlanadi. Uning displeyi 4 dyuymdan iborat, ekran o‘lchami 800×480.

Shuningdek, tezkor xotirasi 512 Mb ni tashkil qiladi. Orqa va old kameralari esa 5 va 1,3 megapikseldan iborat.

Perfect1 dan farqli ravishda, Adi 5S faqat qora rangda chiqariladi. Telefonning o‘lchamlari 127,4×65×9,9 mm, og‘irligi 124 gramm.