O‘zbekistonda 11-mart kuni imzolangan qonun bilan jonli ijro san’ati yanada rivojlantiriladi. Bu haqda Adliya vazirligi xabar berdi.
Qonun bilan “Madaniy faoliyat va madaniy tashkilotlar to‘g‘risida”gi qonunga Madaniyat vazirligining jonli ijro san’atini rivojlantirish yo‘nalishidagi vakolatlarini, shuningdek, konsert-tomosha tadbirlarida fonogrammadan foydalanish darajasiga qarab musiqiy va boshqa asarlarni ijro etish usullarini aniqlashtirishni nazarda tutuvchi o‘zgartirish va qo‘shimchalar kiritilmoqda.
Bundan tashqari, “Isteʼmolchilarning huquqlarini himoya qilish to‘g‘risida”gi va “Reklama to‘g‘risida”gi qonunlarga konsert-tomosha tadbirlarida fonogrammadan foydalanish darajasi haqida axborot berish tartibini belgilovchi o‘zgartirishlar kiritilmoqda.
Konsert-tomosha tadbirining dasturida ijrochi va asar mualliflari to‘g‘risidagi ma’lumotlar ko‘rsatilishi shartligi belgilandi.
Konsert-tomosha tadbirlarida musiqali va boshqa asarlarni ijro etishda fonogrammadan foydalanish darajasiga qarab, ijrochilar tomonidan quyidagi usullar bilan ijro amalga oshirilishi mumkin:
- jonli ijro
- fonogrammadan qisman foydalangan holda.
- fonogrammadan foydalangan holda.
Qonun rasmiy e’lon qilingan kundan e’tiboran kuchga kirdi.
“O‘zbekiston Respublikasining ayrim qonun hujjatlariga jonli ijro sanʼatini yanada rivojlantirishga qaratilgan o‘zgartirish va qo‘shimchalar kiritish to‘g‘risida”gi qonun Senatning uchinchi yalpi majlisida maʼqullangandi.
O‘zbekistonda 2020-yil 1-sentyabrdan boshlab davlat organlari va tashkilotlari tizimidagi konsert, madaniyat saroylari va boshqa muassasalarda to‘liq jonli ijro asosida o‘tkazilgan konsert dasturlari uchun ijara to‘lovidan 50 foiz chegirma berish tartibi joriy qilingan.
Turli mamlakatlar qonunchiligida ham fonogrammadan foydalanish taqiqlangan. Xususan, Ozarbayjonda 2001-yildan, Turkmanistonda 2005-yildan, Tojikistonda 2007-yildan va Qirg‘izistonda 2023-yildan boshlab davlat muassasalari va ommaviy tadbirlarda fonogrammada qo‘shiq kuylash taqiqlangan. Xitoyda 2008-yildan boshlab tijorat konsert-tomosha tadbirlarida fonogrammalardan foydalanish qat’iyan taqiqlangan. Bunda, san’atkorlardan jonli kuylash talab qilinadi va tadbir tashkilotchilari ushbu talabga rioya etilishini nazorat qilishlari shart.
Izoh (0)