Ўзбекистонда 11 март куни имзоланган қонун билан жонли ижро санъати янада ривожлантирилади. Бу ҳақда Адлия вазирлиги хабар берди.
Қонун билан “Маданий фаолият ва маданий ташкилотлар тўғрисида”ги қонунга Маданият вазирлигининг жонли ижро санъатини ривожлантириш йўналишидаги ваколатларини, шунингдек, концерт-томоша тадбирларида фонограммадан фойдаланиш даражасига қараб мусиқий ва бошқа асарларни ижро этиш усулларини аниқлаштиришни назарда тутувчи ўзгартириш ва қўшимчалар киритилмоқда.
Бундан ташқари, “Истеъмолчиларнинг ҳуқуқларини ҳимоя қилиш тўғрисида”ги ва “Реклама тўғрисида”ги қонунларга концерт-томоша тадбирларида фонограммадан фойдаланиш даражаси ҳақида ахборот бериш тартибини белгиловчи ўзгартиришлар киритилмоқда.
Концерт-томоша тадбирининг дастурида ижрочи ва асар муаллифлари тўғрисидаги маълумотлар кўрсатилиши шартлиги белгиланди.
Концерт-томоша тадбирларида мусиқали ва бошқа асарларни ижро этишда фонограммадан фойдаланиш даражасига қараб, ижрочилар томонидан қуйидаги усуллар билан ижро амалга оширилиши мумкин:
- жонли ижро
- фонограммадан қисман фойдаланган ҳолда.
- фонограммадан фойдаланган ҳолда.
Қонун расмий эълон қилинган кундан эътиборан кучга кирди.
“Ўзбекистон Республикасининг айрим қонун ҳужжатларига жонли ижро санъатини янада ривожлантиришга қаратилган ўзгартириш ва қўшимчалар киритиш тўғрисида”ги қонун Сенатнинг учинчи ялпи мажлисида маъқулланганди.
Ўзбекистонда 2020 йил 1 сентябрдан бошлаб давлат органлари ва ташкилотлари тизимидаги концерт, маданият саройлари ва бошқа муассасаларда тўлиқ жонли ижро асосида ўтказилган концерт дастурлари учун ижара тўловидан 50 фоиз чегирма бериш тартиби жорий қилинган.
Турли мамлакатлар қонунчилигида ҳам фонограммадан фойдаланиш тақиқланган. Хусусан, Озарбайжонда 2001 йилдан, Туркманистонда 2005 йилдан, Тожикистонда 2007 йилдан ва Қирғизистонда 2023 йилдан бошлаб давлат муассасалари ва оммавий тадбирларда фонограммада қўшиқ куйлаш тақиқланган. Хитойда 2008 йилдан бошлаб тижорат концерт-томоша тадбирларида фонограммалардан фойдаланиш қатъиян тақиқланган. Бунда, санъаткорлардан жонли куйлаш талаб қилинади ва тадбир ташкилотчилари ушбу талабга риоя этилишини назорат қилишлари шарт.
Изоҳ (0)