Qishloq xo‘jaligi vazirligi Rossiya tomonidan shakar eksportiga 2024-yil 31-avgustgacha taqiq joriy etilgani, shu sababdan shakar narxi oshishi haqida ijtimoiy tarmoqlardagi xabarlarga munosabat bildirdi.
Qayd etilishicha, O‘zbekistonda shakarga bo‘lgan yillik talab o‘rtacha 650-700 ming tonnani tashkil etadi. Respublikada faoliyat yuritayotgan ikkita — “Angren Shakar” va “Xorazm Shakar” MCHJ shakar ishlab chiqarish korxonalarining yillik ishlab chiqarish quvvati 900 ming tonnadan ko‘p bo‘lib, bu ichki bozorni talabidan ortig‘i bilan taʼminlashga yetarlidir.
Rossiya tomonidan shakar eksportini cheklash O‘zbekistonning ichki bozorida tanqislikni keltirib chiqarmaydi, chunki respublikadagi yirik shakar ishlab chiqaruvchi zavodlarning faoliyati Rossiya bilan bog‘liq emas va 2023-yilda xomashyo, asosan, 762 ming tonna miqdorida (shakar chiqishi 98 foiz) Braziliya va Hindistondan import qilingan.
“Ayni paytda ikkita shakar ishlab chiqarish zavodlari tomonidan birjaga ichki bozor uchun har kuni 2 100 tonna mahsulot chiqarilayotgan bo‘lib, uning atigi o‘rtacha 300 tonnasi sotilmoqda, xolos”, — deyiladi xabarda.
Shakar ishlab chiqaruvchi korxonalar maʼlumotiga ko‘ra, bugungi kunda yetarli (4 oylik savdo uchun) shakar va shakar xomashyosi zaxirasi mavjud bo‘lib, Braziliyadan xomashyo kirib kelishi davom etmoqda.
“Shunday ekan nafaqat Rossiyadan, balki boshqa mamlakatlardan ham tayyor shakar mahsuloti importi cheklansa-da, mahalliy korxonalar tomonidan ichki talabni to‘la qondirish imkoniyati mavjud. Albatta, bu kabi xabarlar har yili mavsum boshlanishidan oldin manfaatdor insonlar tomonidan ijtimoiy tarmoqlarga sizdiriladi. Shuning uchun barchani ogohlikka chaqiramiz”, — deya ta’kidlanadi munosabatda.
Eslatib o‘tamiz, 2023-yilda Raqobatni rivojlantirish va iste’molchilar huquqlarini himoya qilish qo‘mitasi respublika aholisini yetarli miqdorda va maqbul narxlarda shakar va un mahsulotlari bilan taʼminlash bo‘yicha hukumat tomonidan zarur choralar ko‘rilganini ma’lum qilgandi.
Izoh (0)