Toshkentda uchta avtomobil to‘qnashdi

Toshkentning Chilonzor tumanida 31-mart kuni soat 22:45 larda ikkita Cobalt va Nexia-3 ishtirokida YTH yuz berdi.

Poytaxt IIBB Yo‘l harakati xavfsizligi boshqarmasining ma’lum qilishicha, Seul ko‘chasida 2002-yilda tug‘ilgan M.G. boshqaruvidagi Cobalt, 1994-yilda tug‘ilgan M.P. boshqaruvidagi Nexia-3 va 1982-yilda tug‘ilgan D.B. boshqaruvidagi Cobalt to‘qnashgan.

Oqibatda Cobalt haydovchisi M.G. va Nexia-3 haydovchisi M.P. tan jarohat olgani sababli shifoxonaga olib ketilgan.

Ijtimoiy tarmoqlarda ushbu avtomashinalarning yo‘l-transport hodisasidan keyingi holati aks etgan videolar tarqaldi.

Ayni paytda holat yuzasidan Toshkent shahar IIBB Yo‘l harakati xavfsizligi boshqarmasi mas’ul xodimlari tomonidan surishtiruv ishlari olib borilmoqda.