Dashtobod temiryo‘l stansiyasi boshlig‘i pora olgan vaqtida ushlandi

Jizzax viloyatida Dashtobod temiryo‘l stansiyasi boshlig‘i pora olgan vaqtida ushlandi. Bu haqda DXX xabar berdi. 

Ma’lum qilinishicha, “Temiryo‘linfratuzilma” AJning Jizzax viloyati Zomin tumanidagi Dashtobod stansiyasi boshlig‘i ixtisoslashmagan do‘konlarda boshqa tovarlar chakana savdosi bilan shug‘ullanuvchi MCHJ tomonidan Tojikiston hududidan O‘zbekistonga olib kelinadigan ko‘mir mahsuloti ortilgan 100 ta yuk vagonlarini o‘zining tanishlari orqali bojxona ko‘rigidan navbatsiz o‘tkazib berish, stansiyada yukni tushirish jarayonida vagonlar belgilangan vaqtdan ortiq turib qolgan taqdirda temiryo‘l jarimasini qo‘llamaslik hamda yuk belgilangan vaqtda tushirib olingani bo‘yicha hujjatni rasmiylashtirib berish evaziga har bir vagon uchun 100 AQSH dollaridan jami 10 ming AQSH dollari talab qilgan. 

Davlat xavfsizlik xizmati va Bosh prokuratura huzuridagi departament xodimlari hamkorligida o‘tkazilgan tezkor tadbirda stansiya boshlig‘i 40 ta vagon uchun 4 ming AQSH dollari olgan vaqtida ashyoviy dalillar bilan ushlandi. 

Hozirda unga nisbatan Jinoyat kodeksining 210-moddasi (pora olish) bilan jinoyat ishi qo‘zg‘atilib, qamoq ehtiyot chorasi qo‘llanilgan. 

Ta’kidlanishicha, mazkur mansabdor shaxs muqaddam Jinoyat kodeksining 169-moddasi (o‘g‘rilik) bilan sudlangan.

2024-yilning fevralida Buxoro viloyatining Kogon tumani prokurori B.G‘. 90 ming dollar pora bilan qo‘lga tushgandi. Prezident bu holatni tanqid qilib, prokurorni noinsof deb aytgandi. Aprel oyida Qarshi tumani prokuraturasi tergovchisi ish yurituvidagi jinoyat ishi bo‘yicha aybdor shaxsga nisbatan yengillik qilib berish evaziga 5 ming dollar pora bilan ushlandi. Iyun oyida esa Surxondaryo viloyati prokuraturasi bo‘lim katta prokurori 10 ming dollar pora olayotganida ushlangani ma’lum qilingandi.