O‘zbekistonda aksariyat holatlarda pora bergan odam jazolanmayapti. Bu haqda sog‘liqni saqlash vaziri vazifasini bajaruvchi Asilbek Xudayarov “Nogironlikni belgilashning samarali mexanizmlari hamda tibbiy-ijtimoiy ekspertiza xizmati tizimini takomillashtirish” mavzusida o‘tkazilgan seminarda aytib o‘tdi.
9-avgust kuni Ijtimoiy himoya milliy agentligida bo‘lib o‘tgan tadbirda vazir “Gazeta.uz” muxbirining nogironlikni belgilashning yangi tizimi korrupsiyadan qay darajada xoli bo‘lishi haqidagi savoliga javob qaytardi:
“Birinchi o‘rinda, rahbariyatda, yaʼni (har bir) tizim boshida turganlarning o‘zida va jamoasida korrupsiyaga qarshi kurashish bo‘yicha xohish bo‘lishi kerak. Men sizga vaʼda beraman: Sog‘liqni saqlash vazirligi markaziy apparatida va, o‘ylaymanki, Ijtimoiy himoya milliy agentligida, yaʼni Mansurbek akaning jamoasida ham korrupsiyaga yo‘l qo‘ymaslik uchun xohish juda kuchli. Buni men ko‘pchilikning ichida aytishim mumkin.
Ikkinchidan, korrupsiyaga yo‘l qo‘ymaslik tarbiyaga bog‘liq, qonundan qanchalik qo‘rqishga va qonunga amalga qilishga bog‘liq. Asosiysi, mening ishimda prinsip bor: xodim korrupsiyaga aralashmasligi, vazifasini to‘liq bajarishi uchun (qilayotgan) ishi o‘ziga yoqishi va o‘sha ishni yo‘qotib qo‘yishdan qo‘rqishi kerak. Bizlar esa xodimlarga maosh tomondan ham, shart-sharoitlar tomondan ham sharoit yaratashimiz, ularni asossiz ayblashga bormasligimiz kerak, o‘shanda u ishini vijdonan bajaradi”, dedi vazirlik rahbari.
“Aholiga OAV orqali tushuntirishimiz kerakki, O‘zbekistonda korrupsiyaga tasnif berilganda porani olgan ham, bergan ham jazolanadi. Afsuski, aksariyat holatlarda porani bergan odam jazolanmayapti”, deya qo‘shimcha qildi Asilbek Xudayarov.
Uning qayd etishicha, Sog‘liqni saqlash vazirligi korrupsiyaga qarshi kurashishga tayyor. Vazirlikka blogerlar, jurnalistlar tomonidan mish-mishlar orqali emas, aniq faktlar bilan murojaat qilinsa, vazirlik har bir holat bo‘yicha tagiga yetib, uning yuzaga chiqarilishiga yordam beradi.
“Men va’da beraman: jurnalistlar bilan ishlashga tayyorman. Shunday holatlar bo‘yicha ma’lumotlar beringlar, marhamat, birga ishlaylik”, degan vazirlik rahbari.
Asilbek Xudayarovning bildirishicha,vazirlikda bir oy oldin nazorat inspeksiyasi tayyor bo‘ldi, shuningdek, koruppsiyaga qarshi kurashish departamenti ham mavjud. Agar (korrupsiyaning o‘ziga) surunkali kasallik sifatida yuqtirgan xodim bo‘ladigan bo‘lsa, unga joyida jazo qo‘llashga va buni hammaga ko‘rsatishga tayyor.
Izoh (0)