Toshkent shahrining Shayxontohur tumanida faoliyat yuritgan hokim yordamchisi fuqarolarning 635 mln so‘m kredit pullarini o‘zlashtirdi. Bu haqda Bosh prokuratura matbuot xizmati xabar berdi.
Maʼlum qilinishicha, hokim yordamchisi M.F. 20 kishiga elektron tarzda bergan tavsiyanomalariga asosan, qabul qilib olgan elektron kalitlardan foydalangan holda jami 427,7 mln so‘mlik kredit mablag‘larini qo‘lga kiritgan.
U pullarning o‘z ehtiyojlariga sarflab yuborgan.
Shuningdek, M.F. o‘zining qarindoshlari va boshqa 5 kishiga mahalla hududida yashamagan bo‘lsa ham qalbaki tavsiyanomalar orqali jami 207,7 mln so‘m kredit mablag‘lari ajratilishiga erishgan. U mazkur pullarni ham o‘zlashtirish yo‘li bilan talon-toroj qilgan.
Mazkur holat yuzasidan Jinoyat kodeksining 168-moddasi 4-qismi “a” bandi (firibgarlik juda ko‘p miqdorda) va boshqa moddalari bilan jinoyat ishi qo‘zg‘atildi.
Hozirda dastlabki tergov harakatlari olib borilmoqda.
Firibgarlik bilan ushlanayotgan hokim yordamchilari
2024-yilning avgust oyida Qashqadaryo viloyatining Shahrisabz shahrida kredit mablag‘larini talon-toroj qilgan hokim yordamchisi va boshqalarga nisbatan jinoyat ishi qo‘zg‘atilgandi.
Yanvar oyida Toshkentda hokim yordamchisi 30 ming dollar olayotganida ushlangandi.
Shuningdek, Surxondaryo viloyatining Qiziriq tumanida hokim yordamchisi 33 mln so‘mlik kreditdan ikki marta olib berish evaziga 4,5 mln so‘m pora olayotganda ushlangan edi.
Izoh (0)