Тошкент шаҳрининг Шайхонтоҳур туманида фаолият юритган ҳоким ёрдамчиси фуқароларнинг 635 млн сўм кредит пулларини ўзлаштирди. Бу ҳақда Бош прокуратура матбуот хизмати хабар берди.
Маълум қилинишича, ҳоким ёрдамчиси М.Ф. 20 кишига электрон тарзда берган тавсияномаларига асосан, қабул қилиб олган электрон калитлардан фойдаланган ҳолда жами 427,7 млн сўмлик кредит маблағларини қўлга киритган.
У пулларнинг ўз эҳтиёжларига сарфлаб юборган.
Шунингдек, М.Ф. ўзининг қариндошлари ва бошқа 5 кишига маҳалла ҳудудида яшамаган бўлса ҳам қалбаки тавсияномалар орқали жами 207,7 млн сўм кредит маблағлари ажратилишига эришган. У мазкур пулларни ҳам ўзлаштириш йўли билан талон-торож қилган.
Мазкур ҳолат юзасидан Жиноят кодексининг 168-моддаси 4-қисми “а” банди (фирибгарлик жуда кўп миқдорда) ва бошқа моддалари билан жиноят иши қўзғатилди.
Ҳозирда дастлабки тергов ҳаракатлари олиб борилмоқда.
Фирибгарлик билан ушланаётган ҳоким ёрдамчилари
2024 йилнинг август ойида Қашқадарё вилоятининг Шаҳрисабз шаҳрида кредит маблағларини талон-торож қилган ҳоким ёрдамчиси ва бошқаларга нисбатан жиноят иши қўзғатилганди.
Январь ойида Тошкентда ҳоким ёрдамчиси 30 минг доллар олаётганида ушланганди.
Шунингдек, Сурхондарё вилоятининг Қизириқ туманида ҳоким ёрдамчиси 33 млн сўмлик кредитдан икки марта олиб бериш эвазига 4,5 млн сўм пора олаётганда ушланган эди.
Изоҳ (0)