Bosh prokuratura Toshkent shahar Shayxontohur tumanida hokim yordamchisi fuqarolarning 635 million so‘mini o‘zlashtirgani haqida xabar bergandi. Toshkent shahar hokimligi poytaxtda bunday tavsifga mos keladigan mansabdor shaxs yo‘qligini bildirdi.
Bosh prokuratura axborotida Shayxontohur tumanida faoliyat yuritgan hokim yordamchisi M.F. 20 nafar fuqarolarga elektron tarzda bergan tavsiyanomalariga asosan, qabul qilib olgan elektron kalitlardan foydalangan holda jami 427,7 million so‘mlik kredit mablag‘larini qo‘lga kiritib, oilaviy tadbirkorlikni rivojlantirish, jumladan ehtiyojmand oila a’zolarining hunarmandchilik, kasanachilik, tomorqadan samarali foydalanish, kichik ishlab chiqarish, xizmat ko‘rsatish va boshqa turdagi faoliyati yo‘lga qo‘yilishini tashkillashtirmasdan, o‘z ehtiyojlariga sarflab yuborgani keltirilgan.
Shuningdek, M.F. o‘zining qarindoshlari va boshqa 5 nafar fuqarolarga mahalla hududida yashamagan bo‘lsada, qalbaki tavsiyanomalar orqali jami 207,7 million so‘m miqdoridagi kredit mablag‘lari ajratilishiga erishib, o‘zlashtirish yo‘li bilan talon-toroj qilgani, holat yuzasidan jinoyat ishi qo‘zg‘atilgani ma’lum qilingan.
Shayxontohur tumani hokimligi bunga munosabat bildirib, tumandagi mahallalarning birida hokim yordamchisi bo‘lib faoliyat yuritgan M.F. 2024-yil noyabr oyining 29-sanasida o‘z arizasiga ko‘ra lavozimidan ozod etilganini ma’lum qildi.
Poytaxt hokimligi ham buni tasdiqlab, ommaviy axborot vositalaridan axborotni e’lon qilishda ishonchlilik, xolislik va mas’uliyat tamoyillariga amal qilishga chaqirdi.
Izoh (0)