Prezident qarori bilan O‘zbekistonda farmatsevtika sohasini tartibga solish bo‘yicha yangi talablar belgilandi.
“Majburiy raqamli markirovkalash tizimi samaradorligini oshirishga qaratilgan qo‘shimcha chora-tadbirlar to‘g‘risida”gi qarorga ko‘ra, 2025-yil 1-iyuldan import qiluvchi tashkilot tomonidan O‘zbekistonga olib kirilgan dori vositalarini ularning ulgurji va chakana savdosi bilan shug‘ullanuvchi tadbirkorlarga to‘g‘ridan-to‘g‘ri yoki uning rasmiy dilerlari orqali sotish elektron hisobvaraq-faktura asosida amalga oshiriladi.
2025-yil 1-sentyabrdan farmatsevtika faoliyatini hamda dori vositalari va tibbiy buyumlarni chakana sotish faoliyatini litsenziyalash talablari kuchaytiriladi.
Yangidan tashkil etilgan subyektlarga faoliyatini amalga oshirish uchun ko‘chmas mulk bo‘yicha ijara yoki tekin foydalanish shartnomasi soliq organlarida hisobga qo‘yilgan bo‘lishi kerak. Dori vositalarini sotishda xaridorlardan to‘lovlarni qabul qilishda elektron to‘lov vositalaridan foydalanish imkoniyati yaratilgan bo‘lishi lozim.
Soliq tekshiruvlarida kirim hujjatlarisiz (kontrafakt) va markirovkalanmagan dori vositalarini sotib olish, tashish va saqlash holatlari aniqlansa, soliq organlari tashabbusi bilan vakolatli organ tomonidan tegishli subyekt litsenziyasining amal qilishi to‘xtatib turiladi.
Prezident qarori bilan, shuningdek dori vositalari va tibbiy buyumlarni ishlab chiqaruvchi korxonalar tomonidan agregatsiyalash tizimini joriy qilish muddati 2025- yilning 1-oktyabrigacha uzaytirildi.
Raqamli markirovkalash
Bu tovar aylanmasini nazorat qilishning avtomatlashtirilgan tizimi. Raqamli belgilar qoʼllanilishi mahsulot haqidagi barcha maʼlumotlarni olish imkoniyatini beradi. Jumladan, ishlab chiqaruvchining nomi, tayyorlangan tovar yoki sotiladigan joy, sana va vaqt, yaroqlilik muddati, standart raqami kabi maʼlumotlar maxsus kod ostiga joylashtiriladi.
Vazirlar Mahkamasining 2022-yil 2-apreldagi “Dori vositalari va tibbiy buyumlarni majburiy raqamli markirovkalash tizimini joriy etish to‘g‘risida”gi qaroriga muvofiq, mamlakatda dori va tibbiy mahsulotlarni raqamli markirovkalash tizimi bosqichma-bosqich joriy etilishi belgilangandi.
Izoh (0)