Pokistonda Hindistonga qarshi keng ko‘lamli urush boshlashdan boshqa chora qolmadi. Bu haqda Pokiston mudofaa vaziri Xavaja Muhammad Asif ma’lum qildi.
“Urushdan boshqa choramiz yo‘q. Biz ularga ham xuddi shunday qadam bilan javob berishimiz kerak”, dedi vazir Pokiston telekanallaridan biriga bergan intervyusida.
Jurnalistning “Urush bo‘lishi aniqmi”, degan savoliga mudofaa vaziri “Albatta, bunga hech qanday shubha bo‘lishi mumkin emas”, deb javob berdi.
8-may kuni Pokiston va Hindiston zamonaviy aviatsiya tarixidagi eng yirik va eng uzoq davom etgan havo jangni o‘tkazgani xabar berilgandi.
25 ta jangovar samolyot taxminan bir soatdan ortiq o‘zaro kurash olib borgan. Shunga qaramay, hech bir tomon o‘z havo hududini tark etmagan, ba’zi raketa zarbalari esa 160 kilometrdan ortiq masofadan amalga oshirilgan.
Pokiston xavfsizlik xizmatining CNN bilan suhbatlashgan yuqori martabali vakili 2019-yildan so‘ng tomonlar bir-birining havo hududiga nisbatan ehtiyotkorlik bilan yondasha boshlaganini bildirgan. O‘shanda pokistonlik uchuvchi hindlarning MiG-21 qiruvchisini urib tushirgandi.
“Shundan beri hech kim yana tahqirlanishni xohlamaydi”, deydi CNN manbasi.
Ayni shu bois bu safargi jangda ham tomonlar o‘z havo hududidan chiqmay harakat qilib, uzoq masofadan “havo-havo“ raketalari uchirish bilan cheklangan.
Izoh (0)