AOKAda Davlat xizmatini rivojlantirish agentligi, Davlat siyosati va boshqaruvi akademiyasi, “El-yurt umidi” jamg‘armasi rahbariyati ishtirokida o‘tkazilgan matbuot anjumanida salohiyatli kadrlarni maqsadli tayyorlash va ularni davlat xizmatiga samarali jalb etish bo‘yicha qabul qilingan hujjatlarning mazmun-mohiyati yuzasidan maʼlumot berildi.
“El-yurt umidi” jamg‘armasi tomonidan 2 ming 225 nafar stipendiatlar 45 ga yaqin davlatga o‘qishga yuborilib, byudjetdan jami 1,5 trillion so‘m yo‘naltirildi. Hozirgacha ularning 1 ming 400 nafari O‘zbekistonga qaytib, iqtisodiyot tarmoqlarida, taʼlim, fan, tibbiyot va davlat boshqaruvida ishlamoqda. Bugungi kunda 748 nafar stipendiatlar top-300 talikdagi nufuzli universitetlarda taʼlim olyapti.
Xalqaro reytinglarda top-100 talik universitetlarga grant asosida o‘qishga kirgan nomzodlarga “El-yurt umidi” stipendiyasi imtihonlarsiz ajratiladi. Top-300 talikda bo‘lgan universitetlarga grantga kirganlarga xalqaro transport va turar joy xarajatlari imtihonlarsiz qoplab beriladi. Top-20 talikdagi universitetlar bakalavriatiga 50 foiz grant asosida qabul qilingan Prezident maktablari bitiruvchilariga stipendiyalar tanlovlarsiz ajratiladi.
— Talabalarning xalqaro standartlarga mos keluvchi sharoitda ta’lim olishi, turli sohalarni rivojlantirishi bo‘yicha imkoniyat yaratilyapti. Shu nuqtayi nazardan, bundan buyon talabalarimizni faqat xorijga yuborish emas, nufuzli olim va professorlarni o‘zimizda dars berishi, fanni o‘qitishi uchun jalb qilish, ya’ni moliyaviy tomondan rag‘batlantirish bo‘yicha ham ishlar amalga oshiriladi. Talabalar qamrovi esa 20-50 ta bilan cheklanib qolmay, 200-300 nafargacha ko‘paytirish mumkin.
Top-300 talikka kirgan universitetlar bizning oliygohlar bilan olib boradigan qo‘shma dasturlar, yangi kampuslarni ochish bo‘yicha jamg‘armasi prezident tomonidan to‘liq qo‘llab-quvvatlanadi.
Natija bugun-erta bo‘lmasligi mumkin, ammo boshqaruv kengashlari tomonidan tartibi ishlab chiqiladi, murojaat etgan universitetlarning takliflari o‘rganib chiqiladi. Umid qilaman-ki, kamida kelasi yildan boshlaymiz, universitetlardan esa ishlab chiqilgan takliflarini kutib qolamiz, deydi “El-yurt umidi” jamg‘armasi ijrochi direktori Gulnoza Ismailova “Daryo”ga bergan intervyusida.
— Hozirda ijtimoiy tarmoqlarda “El-yurt umidi” jamg‘armasi stipendiantiga tayyorlov kurslari kabi turli reklamalar tarqalgan. Jamg‘arma stipendiati bo‘lish uchun hech qanday kurslarga qatnashish kerak emas. Belgilangan nizom qoidalarni o‘rganing, talablar bilan tanishib chiqing va hujjatlaringizni topshiring. Hech qanday tayyorlov kurslariga hojat yo‘q, deya talabalarga ham murojaat qildi jamg‘arma ijrochi direktori.
Endi davlat xizmatchilari uchun uchta dastur — malaka oshirish, qayta tayyorlash va magistratura yo‘lga qo‘yiladi. Barcha uzoq va o‘rta muddatli o‘quvlar xorijiy hamkorlar bilan qo‘shma taʼlim dasturlari hamda Iqtisodiy hamkorlik va taraqqiyot tashkilotining tayanch tavsiyalari asosida tashkil etiladi.
— Magistraturada “Davlat boshqaruvi”, “Davlat siyosati”, “Hududlarni kompleks rivojlantirish”, “Inson resurslarini rivojlantirish” va “Davlat moliyasini boshqarish” yo‘nalishlarida 18 oygacha muddatda chuqurlashtirilgan bilimlar beriladi. Davlat buyurtmasidan tashqari to‘lov-kontrakt shaklida ham talabgorlar qabul qilinadi. Magistraturaga qabul qatʼiy talablar asosida — yuqori malakaga ega, ikki yil ish tajribasi bor va tavsiyaga ega kadrlar tanlov orqali qabul qilinadi, dedi O‘zbekiston Respublikasi prezidenti huzuridagi Davlat siyosati va boshqaruvi akademiyasi rektori Jasur Salihov.
Bundan tashqari, xorijiy fuqarolar uchun magistratura va qayta tayyorlash dasturlariga qabul ochilgan hamda qayta tayyorlash dasturlari kengaytiriladi — “Rahbar ayollar”, “Kelajak liderlari”, “Tizimli tahlil va strategik rejalashtirish”, “Investitsiyalarni jalb etish” kabi qisqa muddatli qayta tayyorlash kurslari ham tashkil etiladi.
Izoh (0)