Boltiqbo‘yi mamlakatlari hisoblangan Latviya va Estoniya Yevropada inson huquqlarini himoya qilish mexanizmlarini qayta ko‘rib chiqishni talab qildi. Sababi noqonuniy migratsiyadan kelib chiqayotgan tahdidlar tobora ortib bormoqda. Bu haqda Anadolu xabar berdi.
Latviya bosh vaziri Evika Silina va Estoniya bosh vaziri Kristjen Michal tomonidan hammualliflikda yozilgan maktubda to‘qqizta Yevropa mamlakati yetakchilari Yevropa inson huquqlari sudining (YIHS) migratsiya siyosatidagi rolini qayta ko‘rib chiqishni so‘radi. Maktub matni Italiya hukumatining rasmiy veb-saytida e’lon qilingan.
Hujjatda ta’kidlanishicha, YIHSning zamonaviy talqinlari ayrim holatlarda davlatlarga jiddiy jinoyatlarda aybdor deb topilgan xorijiy fuqarolarni deportatsiya qilishga to‘siq bo‘lib, bu fuqarolarning davlat idoralari va adliya tizimiga bo‘lgan ishonchini zaiflashtirmoqda.
“Mamlakatlarimizning xavfsizligi va barqarorligi boshqa barcha omillardan ustun turishi lozim. Zo‘ravonlik, giyohvand moddalar bilan bog‘liq jinoyatlar va boshqa jiddiy tahdidlarga samarali javob qaytara olishimiz zarur”, deyiladi maktubda.
Yetakchilarga ko‘ra, urushdan keyingi Yevropada qabul qilingan xalqaro normalar bugungi kunda zamonaviy migratsiya oqimlarining hajmiga to‘liq javob bera olmayapti. Maktubda jinoyatchilar deportatsiya qilinmay, jamiyat uchun xavf solishni davom ettirayotganiga alohida e’tibor qaratilgan.
Maktub Latviya, Estoniya, Daniya, Italiya, Avstriya, Belgiya, Chexiya, Litva va Polsha yetakchilari tomonidan imzolangan.
Latviya bosh vaziri Evika Silina milliy nazoratni kuchaytirish zarurligini ta’kidlab, global muammolar fonida Yevropada inson huquqlari tizimining kelajagi haqida ochiq va halol muloqot o‘tkazilishi kerakligini bildirdi.
Maktubda, shuningdek, Yevropa Ittifoqi chegaralarida migratsiyani bosim vositasi sifatida qo‘llayotgan do‘stona bo‘lmagan davlatlarga qarshi birgalikda kurashish chaqirig‘i bor.
Izoh (0)