Xitoylik paraplanchi 8500 metr balandlikdan sakrab omon qoldi. Hodisa tasodifan bo‘lgani aytilmoqda. Bu haqda BBC xabar berdi.
55 yoshli Peng Yujiang Xitoyning shimoli-g‘arbida yangi uskunani sinab ko‘rayotgan edi. U Qilian tog‘lari ustida, dengiz sathidan 3 ming metr balandlikda parvoz qilayotganda bulutlar oqimi uni yana 5 ming metr balandga uchirib ketgan.
Voqea 24-may kuni sodir bo‘lgan va paraplanchining glideriga o‘rnatilgan kameraga muhrlangan. Video Xitoyning Douyin tarmog‘iga juda keng tarqalib ketgan. Videoda Peng glider boshqaruvini mahkam ushlab turgani, yuzi va tanasining ko‘p qismi muz bo‘lakchalari bilan qoplangani ko‘rinadi.
“Bu juda qo‘rqinchli bo‘ldi... Hammayoq oq rangga burkangan edi. Qaysi tomonga ketayotganimni ko‘ra olmay qoldim. Kompas bo‘lmaganda, qayerga ketayotganimni bilmas edim. Men to‘g‘ri uchyapman deb o‘yladim, lekin aslida aylanayotgan ekanman. Tezroq pastga tushishga harakat qildim, lekin iloji bo‘lmadi. Yanada balandroqqa ko‘tarilib ketdim va bulut ichiga kirib qoldim”, dedi u.
Peng Everestdan ham kamroq kislorod bo‘lgan sharoitda omon qoldi. Harorat bunday balandlikda -40 darajagacha bo‘lishi mumkin. Xitoy hukumati hodisa ustida tergov boshlagan. U parvozni ruxsatsiz amalga oshirgani sababli faoliyatidan olti oyga chetlatilgan, deb xabar berildi.
Izoh (0)