Hindistonda 36 soat davomida Himolay tog‘laridagi qor ko‘chkisi ostida qolib ketgan ishchilar metall konteynerlardan tirik holda olib chiqildi. Bu haqda CNN xabar berdi.
Uttarakhand shtati Mana qishlog‘ida 28-fevral kuni dengiz sathidan taxminan 10500 fut (3200 metr) balandlikda kuchli qor ko‘chishi boshlangan. Hindiston armiyasi ushbu hududda keng miqyosida qutqaruv operatsiyasini boshlagan. Konteynerlar ichida 46 ga yaqin ishchi tirik qolgani aniqlangan, sakkiz ishchi halok bo‘lgan.
Qutqarilganlarning aksariyati uzoq hududda yashovchi, avtomobil yo‘li qurilishiga jalb qilingan mehnat muhojirlaridir.
Ishchilar odatda chodir tikib yashashadi, biroq noqulay ob-havo tufayli sakkizta metall konteynerda vaqtinchalik kun kechirishgan. Bu esa ko‘plab ishchilarning tirik qolishiga sabab bo‘lgan.
Konteynerlar ko‘chki payti odamlar xavfsizligini maksimal darajada ta’minlagan va eng muhimi, qutqaruv ishlarini osonlashtirgan. Chunki qor ostida ko‘milgan jasadni topish katta konteynerni topishdan ko‘ra qiyinroq.
Himoloyda bu kabi qor ko‘chkilari asosan qishda tez-tez ro‘y beradi. Ammo yaqin yillardagi global havo isishi tufayli bu jarayon uzviyligi avvalgilarga qaraganda ancha jadallashgan. Xususan, 2010-yilda Himoloydagi muzliklar oldingi o‘n yillik bilan solishtirganda 65 foizga tezroq erigan. Muzlik yonbag‘irlarining eroziyasi, shuningdek, toshqinlar ham ko‘chkilar ehtimolini oshiradi. Bu tog‘li hududlarda yashovchi millionlab odamlar hayotini xavf ostiga qo‘yadi.
2021-yilda Uttarakhandda muzlikning bir qismi qulashi oqibatida 200 dan ortiq odam halok bo‘lgan edi.
Izoh (0)