Ijtimoiy tarmoqlarda Qashqadaryo viloyati adliya boshqarmasi Salohiddin Nuriyev xalq puli davlat byudjetiga o‘tsa, u davlatning puliga aylanishini aytgan video tarqalib, keng muhokamalarga sabab bo‘ldi.
Video 31-may kuni bo‘lib o‘tgan Qashqadaryo viloyati adliya boshqarmasining navbatdagi kengaytirilgan hay’at majlisidan olingan. Unda qashqadaryolik blogerlardan biri davlat xizmatchilarini ijtimoiy tarmoqlarda tanqid qilish taqiqlanadigan bo‘lsa, davlat byudjetidan oylik olmasligi kerakligini, chunki ular xalq to‘lagan soliqlardan oylik olayotganini aytgan.
“Soliqni hamma to‘laydi, bitta siz emas. Shu jumladan, oylik olayotgan odamning o‘ziga ham to‘lagan solig‘ining ma’lum bir qismi aylanib keladi. Xalqning mulki, xalqning puli degan narsa bu davlat byudjetiga o‘tdimi, davlatning puliga aylanadi o‘z-o‘zidan. U qanaqa yo‘l bilan shakllanishi ikkinchi masala. Chunki unda hamma ishtirok etadi”, — degan bunga javoban Salohiddin Nuriyev.
Adliya vazirligi munosabat bildirib, holat o‘rganilayotganini, o‘rganish yakunlari bo‘yicha holatga baho berilishini ma’lum qildi.
Shuningdek, davlat organlari o‘z faoliyatida xalq oldida hisobdor ekani Konstitutsiyada belgilab qo‘yilgani, shu jumladan, Adliya vazirligi faoliyati jamoatchilik oldida qat’iy hisobdorlik prinsipi asosida tashkil etilganini eslatib o‘tdi.
O‘zbekiston Konstitutsiyasiga ko‘ra, xalq davlat hokimiyatining birdan-bir manbaidir. Davlat xalq irodasini ifoda etib, uning manfaatlariga xizmat qiladi. Davlat organlari va mansabdor shaxslar jamiyat va fuqarolar oldida mas’uldirlar.
Barcha fuqarolar, fuqarolik jamiyati institutlari belgilangan tartibda, shu jumladan, O‘zbekiston Respublikasi davlat byudjetining shakllantirilishi hamda ijro etilishi ustidan jamoatchilik nazoratini amalga oshirishi mumkin, — deyiladi munosabatda.
Ma’lumot uchun, Salohiddin Nuriyev 2024-yilning fevralidan buyon Qashqadaryo viloyati adliya boshqarmasiga rahbarlik qilib keladi. Undan avval 2019-yildan Samarqand viloyati adliya boshqarmasida ishlagan.
Izoh (0)