Ижтимоий тармоқларда Қашқадарё вилояти адлия бошқармаси Салоҳиддин Нуриев халқ пули давлат бюджетига ўца, у давлатнинг пулига айланишини айтган видео тарқалиб, кенг муҳокамаларга сабаб бўлди.
Видео 31 май куни бўлиб ўтган Қашқадарё вилояти адлия бошқармасининг навбатдаги кенгайтирилган ҳайъат мажлисидан олинган. Унда қашқадарёлик блогерлардан бири давлат хизматчиларини ижтимоий тармоқларда танқид қилиш тақиқланадиган бўлса, давлат бюджетидан ойлик олмаслиги кераклигини, чунки улар халқ тўлаган солиқлардан ойлик олаётганини айтган.
“Солиқни ҳамма тўлайди, битта сиз эмас. Шу жумладан, ойлик олаётган одамнинг ўзига ҳам тўлаган солиғининг маълум бир қисми айланиб келади. Халқнинг мулки, халқнинг пули деган нарса бу давлат бюджетига ўтдими, давлатнинг пулига айланади ўз-ўзидан. У қанақа йўл билан шаклланиши иккинчи масала. Чунки унда ҳамма иштирок этади”, — деган бунга жавобан Салоҳиддин Нуриев.
Адлия вазирлиги муносабат билдириб, ҳолат ўрганилаётганини, ўрганиш якунлари бўйича ҳолатга баҳо берилишини маълум қилди.
Шунингдек, давлат органлари ўз фаолиятида халқ олдида ҳисобдор экани Конституцияда белгилаб қўйилгани, шу жумладан, Адлия вазирлиги фаолияти жамоатчилик олдида қатъий ҳисобдорлик принципи асосида ташкил этилганини эслатиб ўтди.
Ўзбекистон Конституциясига кўра, халқ давлат ҳокимиятининг бирдан-бир манбаидир. Давлат халқ иродасини ифода этиб, унинг манфаатларига хизмат қилади. Давлат органлари ва мансабдор шахслар жамият ва фуқаролар олдида масъулдирлар.
Барча фуқаролар, фуқаролик жамияти институтлари белгиланган тартибда, шу жумладан, Ўзбекистон Республикаси давлат бюджетининг шакллантирилиши ҳамда ижро этилиши устидан жамоатчилик назоратини амалга ошириши мумкин, — дейилади муносабатда.
Маълумот учун, Салоҳиддин Нуриев 2024 йилнинг февралидан буён Қашқадарё вилояти адлия бошқармасига раҳбарлик қилиб келади. Ундан аввал 2019 йилдан Самарқанд вилояти адлия бошқармасида ишлаган.
Изоҳ (0)