Toshkentda 20 yoshli talaba kanalda cho‘kib, vafot etdi. Bu haqda Bosh prokuratura matbuot xizmati rahbari Hayot Shamsutdinov xabar qildi.
Jahon tillari universitetining 3-bosqich talabasi bo‘lgan, 2004-yilda tug‘ilgan M.I. 19-iyun kuni soat taxminan 12:10 larda ikki kursdoshi bilan cho‘milish maqsadida Bo‘rijar kanaliga kelgan. Yakkasaroy tumani, Yunus Rajabiy ko‘chasi tomonidan suvga tushgan talaba suv oqimi tezligi hamda sovuq bo‘lgani sababli suzib chiqolmasdan cho‘kib, oqib ketgan.
Toshkent shahar FVB qutqaruvchi g‘avvoslar guruhi tomonidan olib borilgan tezkor-qidiruv chora-tadbirlari natijasida, M.I.ning jasadi shu kuni soat taxminan 15:00 larda Chilonzor tumani, Beshyog‘och ko‘chasida joylashgan “Toshkent Gidroelektrstansiyalari”, “Burjar” 4-GES hududidan aniqlanib, olib chiqilgan.
Vafot etgan yigit Surxondaryo viloyati, Denov tumanidan bo‘lib, Jahon tillari universiteti yotoqxonasida yashab kelgan.
Hozirda holat yuzasidan prokuratura tomonidan tergovga qadar tekshiruv harakatlari olib borilmoqda.
Shu yilning aprelida Bo‘rijar kanaliga uch kishi: 35 yoshli ayol va uning 5 yoshli o‘g‘li hamda ularni qutqarmoqchi bo‘lgan 43 yoshli erkak cho‘kib ketgandi. Ona-bola Rossiya fuqarosi, ularni qutqarish ilinjida halok bo‘lgan erkak esa Xitoy fuqarosi edi.
Izoh (0)