Toshkentning Chilonzor tumanidan oqib o‘tuvchi Bo‘rijar kanalida uch kishi cho‘kib ketgani haqida xabar berilgandi. Bosh prokuratura matbuot xizmati rahbari Hayot Shamsutdinov ular chet el fuqarolari ekanini “Daryo”ga maʼlum qildi.
Aniqlanishicha, vafot etgan 35 yoshli ayol M.Yu.Surkan va uning 5 yoshli o‘g‘li M.P.Surkan Rossiya fuqarosi bo‘lib, Toshkentda vaqtincha yashagan. Bolani qutqarmoqchi bo‘lgan erkak esa 43 yoshli Vu Jyunan — Xitoy fuqarosi bo‘lgan.
Bola 10-aprel kuni Yakkasaroy tumani, Sharshara ko‘chasi bo‘ylab oqib o‘tuvchi Bo‘rijar kanali oldida turganida ehtiyotsizlik oqibatida kanalga tushib ketgan va cho‘kkan. Bunga guvoh bo‘lgan xitoylik erkak, so‘ng bolaning onasi uni qutqarish maqsadida kanalga sakragan.
Biroz vaqtdan so‘ng ona-bolaning murdalari Bo‘rijar kanalining Chilonzor tumani hududidan oqib o‘tuvchi qismidan topilgan. FVV Toshkent shahar boshqarmasi tomonidan olib borilgan qidiruv harakatlari natijasida shu kuni xitoylik erkakning ham jasadi topilgan.
Ma’lum qilinishicha, xitoylik erkak Yakkasaroy tumanidagi mehmonxonada vaqtincha yashab kelgan. U 2024-yil 26- mart kuni tadbirkorlarga tarjimonlik qilish maqsadida O‘zbekistonga kelgan.
Ayni paytda holat yuzasidan Chilonzor tuman prokuraturasi tomonidan tergovga qadar tekshiruv harakatlari olib borilmoqda.
Izoh (0)